“பிறந்தநாள் கொண்டாடிய 7 வயது சிறுமி மாயம்”…. காட்டுப்பாதைகளை கரைத்துக் குடித்த ஆடு மேய்ப்பவன்… சிபிசிஐடி வசம் சிக்கிய திடுக்கிடும் ரகசியம்…!

விழுப்புரம் மாவட்டம் செஞ்சி அடுத்த ஆலம்பூண்டி கிராமத்தைச் சேர்ந்த வடிவேலு – பவானி தம்பதியின் 7 வயது மகள் ஹேமலதா, கடந்த அக்டோபர் 11-ஆம் தேதி பிறந்தநாளைக் கொண்டாடிவிட்டுத் தூங்கிய நிலையில் மறுநாள் காலையில் திடீரென மாயமானார். சத்தியமங்கலம் போலீசார் தீவிர தேடுதல் வேட்டையில் ஈடுபட்டு வந்த நிலையில், வழக்கில் எந்த முன்னேற்றமும் ஏற்படாததால் பொதுமக்களின் போராட்டத்தைத் தொடர்ந்து இவ்வழக்கு சிபிசிஐடிக்கு மாற்றப்பட்டது. தற்போது சிபிசிஐடி போலீசார் பல்வேறு கோணங்களில் தீவிர விசாரணை நடத்தி வருகின்றனர்.

சிறுமி மாயமாகி 22 நாட்களுக்கு மேலான நிலையில், சிறுமியின் பெற்றோரிடம் அரசுப் பள்ளியில் வைத்து விசாரணை நடத்தப்பட்டதோடு, அப்பகுதியில் உள்ள டீக்கடைகள் மற்றும் ஓட்டல்களில் சரித்திரப் பதிவேடு குற்றவாளிகளின் புகைப்படங்களைக் காண்பித்துப் போலீசார் விசாரித்து வருகின்றனர். மேலும், சந்தேகத்தின் அடிப்படையில் அடிதடி வழக்கில் சிறையில் இருந்த சரித்திரப் பதிவேட்டுக் குற்றவாளியான ராஜதுரையைச் சிறையிலிருந்து அழைத்து வந்து சத்தியமங்கலம் காவல் நிலையத்தில் வைத்து சிபிசிஐடி அதிகாரிகள் விசாரித்தனர்.

ராஜதுரையிடம் நடத்தப்பட்ட விசாரணையின் மூலமாக அவரது நண்பரான ஆடு மேய்க்கும் அரவிந்த் என்பவரின் தொடர்பு வெளிச்சத்திற்கு வந்தது. அப்பகுதியில் நீண்டகாலமாக ஆடு மேய்த்து வருவதால் காட்டுப்பாதைகளை அறிந்தவரான அரவிந்த்துக்கு, சிறுமி மாயமானது குறித்துக் கூடுதல் தகவல்கள் தெரிந்திருக்கலாம் என்ற கோணத்தில் போலீசார் சந்தேகிக்கின்றனர். இதனையடுத்து, அரவிந்த்தைக் காட்டுப்பகுதிக்கு அழைத்துச் சென்று சிபிசிஐடி போலீசார் நேற்று முதல் விசாரணை நடத்தி வரும் நிலையில், இன்று இரண்டாவது நாளாக அவரிடம் துருவித் துருவி விசாரணை தீவிரப்படுத்தப்பட்டுள்ளது.