திருவாரூர் மாவட்டம் முத்துப்பேட்டையில் கஞ்சா விற்பனைக்கு எதிராகத் தொடர்ந்து செய்தி வெளியிட்டு வந்த தனியார் தொலைக்காட்சி செய்தியாளர் ஹாஜா மொகைதீன், கஞ்சா கும்பலால் வீடுபுகுந்து கொடூரமாக வெட்டப்பட்ட சம்பவம் தமிழகம் முழுவதும் பெரும் அதிர்வலைகளை ஏற்படுத்தியுள்ளது. ஏற்கனவே இச்சம்பவம் தொடர்பாகக் கஞ்சா வழக்கில் ஜாமீனில் வெளிவந்த அப்துல் பாசித் உள்ளிட்டோர் மீது போலீசார் விசாரணை நடத்தி வந்த நிலையில், இந்தத் தாக்குதலின் கொடூரப் பின்னணி தற்போது வெளிவந்துள்ளது. செய்தியாளர் ஹாஜா மொகைதீனின் வீட்டிற்குள் நள்ளிரவில் அத்துமீறி நுழைந்த அந்தப் பயங்கரவாத கஞ்சா கும்பல், தூங்கிக் கொண்டிருந்த அவரைச் சூழ்ந்து கொண்டு கத்தியால் சரமாரியாகக் குத்திவிட்டுத் தப்பியோடியுள்ளது.
இந்தக் கொடூரத் தாக்குதலில் அலறியடித்த ஹாஜா மொகைதீனின் சத்தம் கேட்டு ஓடிவந்த அக்கம் பக்கத்தினர், பலத்த வெட்டுக் காயங்களுடன் ரத்த வெள்ளத்தில் சரிந்து கிடந்த அவரை மீட்டு முத்துப்பேட்டை அரசு மருத்துவமனைக்கு அனுப்பி வைத்தனர். பின்னர் மேல் சிகிச்சைக்காக அவர் திருவாரூர் அரசு மருத்துவக் கல்லூரி மருத்துவமனைக்கு மாற்றப்பட்டார். பத்திரிகையாளர் ஒருவரின் வீட்டிற்கே புகுந்து கஞ்சா கும்பல் நடத்திய இந்தத் துணிகரத் தாக்குதல் சம்பவம், அப்பகுதி மக்களிடையே பெரும் அச்சத்தை ஏற்படுத்தியுள்ளதுடன், குற்றவாளிகளை உடனடியாகக் கைது செய்யக் கோரி பத்திரிகையாளர் அமைப்புகள் கடுமையான கண்டனங்களை எழுப்பி வருகின்றன.