மேயர் To எம்.எல்.ஏ: ஸ்டாலின் பாணியில் பிரியா ராஜன்! அறிவாலயம் போட்ட ‘மாஸ்டர் பிளான்’ இதுதானா?

சென்னை மாநகராட்சியின் முதல் தலித் பெண் மேயரான பிரியா ராஜன், வரும் சட்டமன்றத் தேர்தலில் திரு.வி.க நகர் தொகுதியில் போட்டியிட விருப்பம் காட்டி வருவது அரசியல் வட்டாரத்தில் பெரும் விவாதத்தைக் கிளப்பியுள்ளது. 2022 நகர்ப்புற உள்ளாட்சித் தேர்தலில் அதிக வாக்கு வித்தியாசத்தில் வெற்றி பெற்று மேயரான அவர், தற்போது தனது பதவிக்காலம் முடியவுள்ள நிலையில், முதலமைச்சர் மு.க.ஸ்டாலின் மற்றும் அமைச்சர் மா.சுப்பிரமணியன் ஆகியோரைப் போல மேயர் பதவியிலிருந்து சட்டமன்றத்திற்குச் செல்லும் முனைப்பில் உள்ளார். இதற்காக அவர் தலைமைக்குத் தனது விருப்பத்தைத் தெரிவித்துள்ளதாகவும், அதற்கான களப்பணிகளில் தீவிரம் காட்டி வருவதாகவும் தகவல்கள் வெளியாகியுள்ளன.

திமுகவின் கோட்டையாகக் கருதப்படும் திரு.வி.க நகர் தொகுதியில், தற்போது தாயகம் கவி எம்.எல்.ஏ-வாக இருந்து வருகிறார். இருப்பினும், மேயர் பிரியாவிற்கு மக்கள் மத்தியில் இருக்கும் அறிமுகமும் செல்வாக்கும் அத்தொகுதியைத் தக்கவைக்க உதவும் என திமுக தலைமை கருதுவதாகச் சொல்லப்படுகிறது. குறிப்பாக, மறைந்த பகுஜன் சமாஜ் கட்சித் தலைவர் ஆம்ஸ்ட்ராங்கின் மனைவி பொற்கொடி அதே தொகுதியைக் குறிவைப்பதாகப் பேச்சுக்கள் எழுந்துள்ள சூழலில், அவருக்குப் பலமான போட்டியாளராகவும், அதே சமூகத்தைச் சேர்ந்த பிரதிநிதியாகவும் பிரியாவை நிறுத்துவது திமுகவின் ‘மாஸ்டர் பிளானாக’ பார்க்கப்படுகிறது.

மேயர் பதவியிலிருந்து எம்.எல்.ஏ-வாக உயரும் ஆசையில் இருக்கும் பிரியாவிற்கு, திமுக தலைமை வாய்ப்பளிக்குமா என்பதுதான் தற்போதைய எதிர்பார்ப்பு. ஒருவேளை அவருக்கு சீட் கிடைத்தால், தலித் அரசியலிலும் பெண் பிரதிநிதித்துவத்திலும் அவர் ஒரு முக்கிய இடத்தைப் பிடிப்பார் என்பதில் ஐயமில்லை. தாயகம் கவிக்கு வேறு தொகுதி ஒதுக்கப்படுமா அல்லது பிரியாவிற்குப் புதிய வாய்ப்பு வழங்கப்படுமா என்ற கேள்விக்கு, தேர்தல் நெருங்கும் வேளையில் அதிகாரப்பூர்வப் பட்டியல் மூலம் விடை கிடைக்கும்.