இந்திய ரிசர்வ் வங்கி (RBI) வங்கி வாடிக்கையாளர்களின் நலனை மேம்படுத்தும் வகையில் புதிய விதிகளை அறிவித்துள்ளது, இவை வரும் ஜூலை 1, 2026 முதல் நடைமுறைக்கு வருகின்றன. இந்த புதிய நடைமுறையின்படி, வங்கியின் சேவை குறைபாடுகளால் வாடிக்கையாளர்களுக்கு ஏற்படும் நேரடி நிதி இழப்புகளுக்கு, வங்கி குறைதீர்ப்பாளர் (Banking Ombudsman) மூலம் அதிகபட்சமாக ரூ.30 லட்சம் வரை இழப்பீடு வழங்க அதிகாரம் அளிக்கப்பட்டுள்ளது. இதன் மூலம் வங்கிகளின் பொறுப்புணர்வு அதிகரிக்கப்படுவதோடு, பாதிக்கப்பட்ட வாடிக்கையாளர்களுக்கு விரைவான நீதி கிடைக்க வழிவகை செய்யப்பட்டுள்ளது.
நிதி இழப்பீடு மட்டுமின்றி, வங்கி சேவையில் நிலவும் குறைபாடுகளால் வாடிக்கையாளர்கள் சந்திக்கும் மன உளைச்சல் மற்றும் நேர விரயத்தையும் கணக்கில் கொண்டு இந்த விதிகள் வடிவமைக்கப்பட்டுள்ளன. இதற்காக கூடுதலாக ரூ.3 லட்சம் வரை இழப்பீடு பெற புதிய சட்டத்தில் இடமுண்டு. வங்கி வாடிக்கையாளர்கள் தங்களின் புகார்களை முதலில் சம்பந்தப்பட்ட வங்கியிடம் தெரிவிக்க வேண்டும்; அங்கு திருப்திகரமான தீர்வு கிடைக்காத பட்சத்தில், ரிசர்வ் வங்கியின் குறைதீர்ப்பு மேலாண்மை அமைப்பை (CMS) அணுகி உரிய இழப்பீட்டைப் பெறலாம்.