ஷாக்கிங் நியூஸ்..! முன்னணி செயலிகளில் விஷப் பொருள் விற்பனையா?… சிக்கிய பெரும் நிறுவனங்கள்… அதிரடி காட்டிய உணவுப் பாதுகாப்புத் துறை…!!

மனித உயிருக்குக் கடுமையான ஆபத்தை ஏற்படுத்தக்கூடிய நச்சுத்தன்மை கொண்ட ஊமத்தை பழங்கள் மற்றும் விதைகளை, உண்ணக்கூடிய உணவுப் பொருட்களாக ஆன்லைனில் விற்பனை செய்த முன்னணி நிறுவனங்கள் மீது கர்நாடக அரசு கடும் நடவடிக்கை எடுத்துள்ளது. உணவுப் பாதுகாப்பு விதிகளுக்குப் புறம்பாக, அமேசான், ஸ்விகி இன்ஸ்டாமார்ட், பிக்பாஸ்கெட் ஆகிய நிறுவனங்கள் இந்த அபாயகரமான பொருளை விற்றதை அடுத்து, மாநில உணவுப் பாதுகாப்பு ஆணையர் அவற்றின் உணவு உரிமங்களை உடனடியாகத் தற்காலிகமாக ரத்து செய்து உத்தரவிட்டுள்ளார். மேலும், இவர்களுக்கு இந்த நச்சுப் பொருட்களை விநியோகித்த மொத்த விற்பனையாளர்களின் உரிமங்களும் ரத்து செய்யப்பட்டுள்ளன.

இந்த விவகாரம் தொடர்பாக முன்னதாக விளக்கம் கேட்டும், சம்பந்தப்பட்ட நிறுவனங்களிடமிருந்து முறையான பதில்கள் வராததாலேயே இந்த அதிரடி நடவடிக்கை மேற்கொள்ளப்பட்டுள்ளது. அமேசான் நிறுவனம் எவ்வித பதிலும் அளிக்காத நிலையிலும், ஸ்விகி தரப்பில் கால அவகாசம் கேட்கப்பட்ட நிலையிலும், பிக்பாஸ்கெட் மட்டும் அதன் விற்பனையை நிறுத்திவிட்டு இனி ‘மனிதர்கள் உண்பதற்கு அல்ல’ என்ற தகுந்த எச்சரிக்கை லேபிளுடன் மட்டுமே விற்க உள்ளதாகக் கூறியுள்ளது. பொதுமக்களின் சுகாதாரத்தைக் கருத்தில் கொண்டு, இனிவரும் காலங்களில் அனைத்து ஆன்லைன் வர்த்தகத் தளங்களும் விதிகளுக்கு உட்பட்டு நடப்பதை உறுதிசெய்ய கூடுதல் கண்காணிப்பும் தீவிர சோதனைகளும் நடத்தப்படும் என அரசு தரப்பில் திட்டவட்டமாக எச்சரிக்கப்பட்டுள்ளது.