“பூட்டிய வீட்டுக்குள் 5 சடலங்கள்”… கதவை உடைத்த போலீசாருக்கு காத்திருந்த பேரதிர்ச்சி.. திடுக்கிடும் சம்பவம்….!

உத்தரப் பிரதேச மாநிலம் சகாரன்பூர் மாவட்டத்தில், பூட்டிய வீட்டுக்குள் ஒரே குடும்பத்தைச் சேர்ந்த ஐந்து பேர் துப்பாக்கிக் குண்டுகள் பாய்ந்த நிலையில் சடலமாகக் கண்டெடுக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. கௌஷிக் விஹார் காலனியில் வசித்து வந்த நில அளவையாளர் அசோக் ரதி (40), அவரது மனைவி அஜந்தா (37), தாய் வித்யாவதி (70) மற்றும் மகன்கள் கார்த்திக் (16), தேவ் (13) ஆகியோரே இவ்வாறு உயிரிழந்துள்ளனர். நேற்று காலை நீண்ட நேரமாகியும் வீட்டின் கதவு திறக்கப்படாததால் சந்தேகமடைந்த அண்டை வீட்டார் அளித்த தகவலின் பேரில், போலீசார் கதவை உடைத்து உள்ளே சென்று பார்த்தபோது இந்த கோர சம்பவம் வெளிச்சத்திற்கு வந்தது.

உயிரிழந்த ஐந்து பேரின் தலைகளிலும் மிக நெருக்கமான தூரத்தில் இருந்து துப்பாக்கிச் சூடு நடத்தப்பட்டுள்ளது. அவர்கள் அனைவரும் ஒரே அறையில் சடலமாகக் கிடந்த நிலையில், சம்பவ இடத்திலிருந்து மூன்று கைத்துப்பாக்கிகளைப் போலீசார் மீட்டுள்ளனர். தடய அறிவியல் நிபுணர்கள் மற்றும் மோப்ப நாய் உதவியுடன் போலீசார் தீவிர சோதனையில் ஈடுபட்டனர். உயிரிழந்தவர்களின் உடல்கள் பிரேதப் பரிசோதனைக்காக அனுப்பி வைக்கப்பட்டுள்ளன.

இந்தச் சம்பவம் தற்கொலையா அல்லது திட்டமிட்ட கொலையா என்ற கோணத்தில் போலீசார் தீவிர விசாரணை மேற்கொண்டு வருகின்றனர். வீட்டில் இருந்த மூன்று துப்பாக்கிகள் மற்றும் கதவு உட்புறமாகப் பூட்டப்பட்டிருந்த விதம் ஆகியவை குறித்து ஆய்வு செய்யப்பட்டு வருகிறது. ஒரே குடும்பத்தைச் சேர்ந்த ஐந்து பேர் மர்மமான முறையில் உயிரிழந்தது அப்பகுதி மக்களிடையே பெரும் சோகத்தையும் பீதியையும் ஏற்படுத்தியுள்ளது.