இறுதி வாக்காளர் பட்டியல் வெளியீடு…. லிஸ்ட்ல உங்க பேரு இருக்கா? இல்லையா?…. செக் பண்ணுவது எப்படி?… இதோ சிம்பிள் ஸ்டெப்ஸ்….!

தமிழகத்தில் நீண்ட நாட்களாக நடைபெற்று வந்த வாக்காளர் பட்டியல் திருத்தப் பணிகள் நிறைவடைந்து, 2026-ஆம் ஆண்டிற்கான இறுதி வாக்காளர் பட்டியலை தேர்தல் ஆணையம் இன்று வெளியிட்டுள்ளது. கடந்த அக்டோபர் மாதம் வரை சுமார் 6.41 கோடியாக இருந்த வாக்காளர்களின் எண்ணிக்கை, தீவிர சரிபார்ப்பு மற்றும் நீக்க நடவடிக்கைகளுக்குப் பிறகு தற்போது சுமார் 5.43 கோடியாகக் குறைந்துள்ளது. மாநில தேர்தல் அதிகாரி அர்ச்சனா பட்நாயக் இந்த ஒட்டுமொத்தப் பட்டியலை வெளியிட, மாவட்ட வாரியாக அந்தந்த மாவட்ட ஆட்சியர்கள் அரசியல் கட்சிப் பிரதிநிதிகள் முன்னிலையில் இதனை வெளியிட்டுள்ளனர்.

இந்தத் திருத்தப் பணியின் போது, உயிரிழந்தவர்கள் மற்றும் இரு இடங்களில் பெயர் உள்ளவர்கள் என சுமார் 97 லட்சம் பெயர்கள் பட்டியலிலிருந்து நீக்கப்பட்டுள்ளன. அதே சமயம், புதிய வாக்காளர்களாகப் பெயர் சேர்க்கக் கோரி சுமார் 23 லட்சம் பேர் விண்ணப்பித்திருந்தனர். பெயர் சேர்த்தல், நீக்கல் மற்றும் முகவரி மாற்றம் என மொத்தம் 34 லட்சத்திற்கும் அதிகமான விண்ணப்பங்கள் பெறப்பட்டு, அவை உரிய விசாரணைக்குப் பிறகு இந்தப் புதிய பட்டியலில் இணைக்கப்பட்டுள்ளன.

வாக்காளர்கள் தங்கள் பெயர் பட்டியலில் இடம் பெற்றுள்ளதா என்பதை வீட்டிலிருந்தபடியே எளிதாகச் சரிபார்த்துக் கொள்ளத் தேர்தல் ஆணையம் வழிவகை செய்துள்ளது. பொதுமக்கள் voters.eci.gov.in அல்லது electoralsearch.eci.gov.in ஆகிய இணையதளங்களுக்குச் சென்று, தங்களது வாக்காளர் அடையாள அட்டை (EPIC) எண்ணைப் பதிவிட்டு விவரங்களைச் சரிபார்க்கலாம். இணையதளம் தவிர, தேர்தல் ஆணையத்தின் ‘Voter Helpline’ செயலி மூலமாகவும் ஸ்மார்ட்போன் வழியாகத் தகவல்களைப் பெற்றுக்கொள்ள முடியும்.

வாக்காளர் பட்டியலில் பெயர் இருந்தால் மட்டுமே தேர்தலில் ஜனநாயகக் கடமையை ஆற்ற முடியும் என்பதால், பொதுமக்கள் அனைவரும் இந்த இறுதிப் பட்டியலைச் சரிபார்த்துக் கொள்ளுமாறு அறிவுறுத்தப்படுகிறார்கள். ஒருவேளை தகுதியிருந்தும் பெயர் விடுபட்டிருந்தால் அல்லது பிழைகள் இருந்தால், அதனைச் சரிசெய்ய அடுத்தகட்ட வாய்ப்புகளைப் பயன்படுத்திக் கொள்ளலாம். வரும் தேர்தல்களைக் கருத்தில் கொண்டு, தகுதியுள்ள அனைத்து வாக்காளர்களும் பட்டியலில் இடம்பெறுவதை உறுதி செய்வது அவசியமாகும்.