ஆந்திர மாநிலம் ராஜமுந்திரியில் உள்ள தனியார் மருத்துவக் கல்லூரியில் முதுகலை மருத்துவப் படிப்பு படித்து வந்த 28 வயதான டாக்டர் பிரியங்கா, கடந்த ஆகஸ்ட் 3-ஆம் தேதி வணிக வளாகம் அருகே தனது இருசக்கர வாகனத்தில் சென்றுகொண்டிருந்தார். அப்போது அங்குப் பாதுகாப்பாளர்களுடன் தகராறில் ஈடுபட்டுவிட்டு மதுபோதையில் காரை அதிவேகமாக ஓட்டி வந்த சுவரவரபு துஷ்யந்த் மற்றும் ஆண்ட்ரூ ஜோசப் எட்வர்ட்ஸ் ஆகிய இருவரும், பிரியங்காவின் ஸ்கூட்டர் மீது காரை மோதி அவர் மீது ஏற்றிச் சென்றுள்ளனர். இதில் தலையில் பலத்த காயமடைந்த அவர், மேல் சிகிச்சைக்காக ஹைதராபாத் மருத்துவமனைக்குக் கொண்டு செல்லப்பட்டு தீவிர சிகிச்சைப் பிரிவில் அனுமதிக்கப்பட்டார்.
மருத்துவர்கள் தீவிர முயற்சித்தும் அவர் மூளைச்சாவு அடைந்த நிலையில், ஞாயிற்றுக்கிழமை சிகிச்சை பலனின்றி பரிதாபமாக உயிரிழந்தார். தங்களின் பெரிய குடும்பத்திலேயே முதல் மருத்துவரான மகளை இழந்து பெற்றோர் கண்ணீரில் மூழ்கியுள்ள நிலையில், சிசிடிவி காட்சிகளின் அடிப்படையில் தப்பி ஓடிய இருவரையும் பொலிஸார் கைது செய்து கடுமையான பிரிவுகளின் கீழ் வழக்குப் பதிவு செய்துள்ளனர். இச்சம்பவத்திற்குக் காரணமானவர்களுக்குக் கடுமையான தண்டனை வழங்கக்கோரி மருத்துவ மாணவர்கள் தீவிர போராட்டத்தில் ஈடுபட்டு வருகின்றனர்.