குழந்தைகளுக்கு பாதுகாப்பு அரணாக விளங்க வேண்டிய பெற்றோரே, தங்கள் சொந்த மகளுக்கு பல ஆண்டுகளாக பாலியல், உடல் மற்றும் மனரீதியான கொடூர துன்புறுத்தல்களை அளித்த அதிர்ச்சி சம்பவம் ஸ்பெயினில் வெளிச்சத்துக்கு வந்துள்ளது. ஸ்பெயினின் வெலெஸ்-மலாகா பகுதியைச் சேர்ந்த தம்பதியரின் மகளுக்கு 13 வயதாக இருந்தபோது தொடங்கிய இந்த அத்துமீறல்கள், 2020 முதல் 2023 வரை தொடர்ந்து நடந்துள்ளன. இந்த வழக்கை விசாரித்த மலகா மாகாண நீதிமன்றம், பாதிக்கப்பட்ட சிறுமியின் தந்தையை பாலியல் வன்கொடுமை குற்றத்திற்காகவும், தாயை உடல் மற்றும் மன ரீதியான துன்புறுத்தல் குற்றத்திற்காகவும் குற்றவாளிகளாக அறிவித்து அண்மையில் கடுமையான தண்டனை விதித்துள்ளது.
நீதிமன்ற ஆவணங்களின்படி, 2020 நவம்பர் மாதத்தில் இந்த கொடூரம் முதன்முதலாகத் தொடங்கியுள்ளது. இருட்டுக்கு பயந்த சிறுமி, இரவு நேரங்களில் பெற்றோரின் அறையில் தூங்குவதை வழக்கமாகக் கொண்டிருந்த நிலையில், சிறுமியின் தாய் இரவு வேலைக்குச் செல்வதைப் பயன்படுத்தி தந்தை மகளிடம் தவறாக நடக்கத் தொடங்கியுள்ளார். தூங்கிக் கொண்டிருந்த மகளுக்கு மசாஜ் செய்வதாகக் கூறி அவர் அத்துமீறியுள்ளார். சில மாதங்களுக்குப் பிறகு மீண்டும் இதுபோன்ற சம்பவங்கள் தொடரவே, அச்சத்துடனும் மனவேதனையுடனும் தன் தாயிடம் ஓடிச்சென்று சிறுமி அழுது துடித்துள்ளார். ஆனால், தாயோ மகளுக்கு ஆறுதலாக இருப்பதற்குப் பதிலாக, பெல்ட், சார்ஜர் கேபிள் மற்றும் சமையல் பொருட்களைக் கொண்டு அவளை அடிக்கடி கொடூரமாகத் தாக்கியதுடன், “நீ எதற்கும் லாயக்கற்றவள்” என்று மனரீதியாகவும் சித்திரவதை செய்துள்ளார்.
பல ஆண்டுகளாக நரக வேதனையை அனுபவித்து வந்த சிறுமி, கடந்த 2023 மார்ச் மாதத்தில் தனது பள்ளி ஆலோசகரிடம் கண்ணீர் மல்க இந்த உண்மைகளைப் பகிர்ந்துள்ளார். இதன் விளைவாக, குழந்தைகள் பாதுகாப்பு நடைமுறைகள் உடனடியாக அமல்படுத்தப்பட்டு, அதிகாரிகள் விசாரணையைத் தொடங்கினர். மேலும், சிறுமி உடனடியாக பெற்றோரின் பிடியில் இருந்து மீட்கப்பட்டு அரசு பாதுகாப்பில் ஒப்படைக்கப்பட்டாள். விசாரணையின் போது, சிறுமியின் சாட்சியத்தை மறைக்க அவளது பெற்றோர் முயன்றபோதிலும், மருத்துவ மற்றும் உளவியல் அறிக்கைகள், பள்ளி நிர்வாகத்தின் தகவல்கள் மற்றும் குழந்தைகள் பாதுகாப்பு அமைப்புகளின் வலுவான ஆதாரங்களின் அடிப்படையில் அவர்களின் வாதங்களை நீதிமன்றம் முற்றிலுமாக நிராகரித்தது.
இந்த வழக்கின் இறுதித் தீர்ப்பாக, குற்றம் சாட்டப்பட்ட தந்தை மற்றும் தாய் இருவருக்கும் நீண்ட கால சிறைத் தண்டனை விதிக்கப்பட்டுள்ளது. அதோடு, பாதிக்கப்பட்ட மகளிடம் அவர்கள் எந்த வகையிலும் நெருங்கவோ அல்லது தொடர்பு கொள்ளவோ கூடாது எனத் தடை உத்தரவும் பிறப்பிக்கப்பட்டுள்ளது. மேலும், தந்தை இனிவரும் காலங்களில் சிறார்களுடன் தொடர்புடைய எந்தவொரு தொழிலிலும் பணியாற்றக் கூடாது என்று தடை விதித்த நீதிபதிகள், பாதிக்கப்பட்ட பெண்ணுக்கு தகுந்த இழப்பீடு வழங்கவும் உத்தரவிட்டுள்ளனர். சமூகத்தில் பெரும் அதிர்வலைகளை ஏற்படுத்தியுள்ள இந்த தீர்ப்பு, குழந்தைகள் மீதான எந்தவொரு வன்முறையும் சட்டத்தின் முன் ஒருபோதும் மன்னிக்கப்படாது என்பதற்கான கடுமையான எச்சரிக்கையாக அமைந்துள்ளது.