பாசத்தின் உச்சமா..? அல்லது பணத்தின் உச்சமா..? மகனின் கல்லறையில் BMW காரையே புதைத்த தந்தை… வெளியான அதிர்ச்சி காரணம்..!!

நைஜீரியாவில் உயிரிழந்த தனது மகனின் உடல் அடக்கம் செய்யப்பட்ட கல்லறைக்கு அருகிலேயே, தந்தை ஒருவர் பல கோடி ரூபாய் மதிப்புள்ள புத்தம் புதிய பிஎம்டபிள்யூ (BMW) காரை புதைத்துள்ள நெகிழ்ச்சியான மற்றும் விசித்திரமான சம்பவம் அரங்கேறியுள்ளது. தனது மகனுக்கு விலையுயர்ந்த கார் ஒன்றைப் பரிசளிக்க வேண்டும் என்ற தந்தையின் நீண்ட நாள் கனவு, மகன் உயிருடன் இருந்தபோது நிறைவேறவில்லை. மகனின் எதிர்பாராத மரணத்தால் துயரமடைந்த தந்தை, அவனது ஆசையை நிறைவேற்றும் விதமாக இந்தக் காரை வாங்கி, கல்லறைத் தோட்டத்திலேயே பெரிய பள்ளம் தோண்டி காரைப் புதைத்துள்ளார்.

இந்தச் சம்பவம் தொடர்பான புகைப்படங்கள் மற்றும் வீடியோக்கள் சமூக வலைதளங்களில் வெளியாகி பெரும் வைரலாகி வருகின்றன. சிலர் தந்தையின் பாசத்தைப் பாராட்டி கருத்து தெரிவித்து வரும் நிலையில், பல கோடி ரூபாய் மதிப்புள்ள ஒரு சொத்தை இப்படி மண்ணுக்குள் புதைப்பதற்குப் பதிலாக, அதே பணத்தில் ஏழைகளுக்கு உதவியிருக்கலாம் எனப் பலரும் விமர்சித்து வருகின்றனர். இருப்பினும், தனது மகனின் மீதான அளவற்ற அன்பின் அடையாளமாகவே தந்தை இந்தச் செயலைச் செய்துள்ளதாக அந்தப் பகுதி மக்கள் தெரிவிக்கின்றனர்.