“தல தளபதின்னு இல்ல.. இது வேற லெவல் பாசம்”…. சிக்னலில் விஜயை வழிமறித்த தொண்டர் செய்த உருக்கமான காரியம்….!

தமிழக சட்டமன்றத் தேர்தல் வரும் ஏப்ரல் 23-ஆம் தேதி நடைபெறவுள்ள நிலையில், களம் தற்போதே அனல் பறக்கத் தொடங்கியுள்ளது. தேர்தல் பிரச்சாரத்திற்கு இன்னும் ஒன்பது நாட்களே எஞ்சியுள்ளதால், அனைத்துக் கட்சித் தலைவர்களும் தீவிர வாக்கு சேகரிப்பில் ஈடுபட்டு வருகின்றனர். தமிழக வெற்றிக் கழகத்தின் தலைவர் விஜய், சில இடங்களில் அனுமதி மறுப்பு மற்றும் கட்டுப்பாடுகள் காரணமாக தனது பிரச்சாரங்களை ரத்து செய்திருந்தாலும், தற்போது இறுதிக்கட்டப் பணிகளில் வேகம் காட்டி வருகிறார்.

அதன்படி, இன்று கன்னியாகுமரி மாவட்டத்தில் நடைபெறவுள்ள பிரச்சார பொதுக்கூட்டத்தில் பங்கேற்பதற்காக விஜய் தனது நீலாங்கரை இல்லத்திலிருந்து சென்னை விமான நிலையம் நோக்கிப் புறப்பட்டார். வழியில் சிக்னல் ஒன்றில் அவரது கார் நின்றபோது, அங்கு திரண்டிருந்த தவெக தொண்டர்கள் உற்சாக மிகுதியால் காரைச் சூழ்ந்துகொண்டனர். அப்போது எதிர்பாராத விதமாகத் தொண்டர் ஒருவர், தான் வைத்திருந்த பையிலிருந்து பூக்களை எடுத்து விஜய் சென்ற காரின் மீது தூவி தனது அன்பை வெளிப்படுத்தினார். இந்தச் செயலால் அந்தப் பகுதியில் சிறிது நேரம் பரபரப்பு நிலவியது.

தொண்டர்களின் ஆரவாரத்திற்கு மத்தியில் சென்னை விமான நிலையம் சென்றடைந்த விஜய், அங்கிருந்து தனி விமானம் மூலம் தூத்துக்குடிக்குப் பயணம் மேற்கொண்டார். பின்னர் தூத்துக்குடியிலிருந்து சாலை மார்க்கமாகக் கன்னியாகுமரிக்கு அவர் செல்கிறார். ஏற்கனவே காரைக்குடி மற்றும் கடலூர் பிரச்சாரங்கள் ரத்து செய்யப்பட்டிருந்த நிலையில், கன்னியாகுமரி வருகை அவரது ஆதரவாளர்களிடையே பெரும் எதிர்பார்ப்பை ஏற்படுத்தியுள்ளது.

இன்று பிற்பகல் 3 மணியளவில் கன்னியாகுமரி மாவட்டம் மகாதானபுரம் சந்திப்பு பகுதியில் நடைபெறவுள்ள பிரம்மாண்ட பொதுக்கூட்டத்தில் விஜய் உரையாற்றுகிறார். தமிழக வெற்றிக் கழகத்தின் ‘விசில்’ சின்னத்திற்கு ஆதரவு திரட்டும் வகையில் அவர் மேற்கொள்ளும் இந்தப் பிரச்சாரத்திற்காகப் பலத்த போலீஸ் பாதுகாப்பு போடப்பட்டுள்ளது. தேர்தலுக்கு இன்னும் சில நாட்களே உள்ள நிலையில், விஜய்யின் இந்தப் பயணம் அரசியல் வட்டாரத்தில் முக்கியத்துவம் வாய்ந்ததாகப் பார்க்கப்படுகிறது.