சமூக ஊடகங்களில் 16 லட்சத்திற்கும் அதிகமான பின்தொடர்பாளர்களைக் கொண்டு மிகவும் பிரபலமாக விளங்கிய 30 வயதான சமூக ஊடக செல்வாக்குமிளிரும் நிதி திவாரி, தனது இல்லத்தில் தூக்கிட்டுத் தற்கொலை செய்து கொண்டுள்ள சம்பவம் பெரும் அதிர்ச்சியை ஏற்படுத்தியுள்ளது. மத்தியப் பிரதேசத்தின் விந்திய பகுதியைச் சேர்ந்த இவர், ஃபேஸ்புக்கில் 9 லட்சம் மற்றும் இன்ஸ்டாகிராமில் 7 லட்சம் பின்தொடர்பாளர்களைப் பெற்றிருந்தார். கடந்த 2024-ஆம் ஆண்டு ‘மிஸ் ப்ரெட்டி இந்தியா’ பட்டத்தை வென்ற நிதி திவாரி, மாடலிங் மற்றும் நடிப்புத் துறையில் தனது வாழ்க்கையைத் தொடர தீவிர முயற்சிகளை மேற்கொண்டு வந்தார்.
சனிக்கிழமை மாலை பூசா மோட் பகுதியில் உள்ள தனது வீட்டில் நிதி திவாரி தூக்கில் தொங்கிய நிலையில் கண்டெடுக்கப்பட்டார். உடனடியாக அவரது குடும்பத்தினர் அவரை மருத்துவமனைக்குக் கொண்டு சென்ற போதிலும், அவர் ஏற்கனவே உயிரிழந்துவிட்டதாக மருத்துவர்கள் தெரிவித்தனர். இச்சம்பவம் நிகழ்ந்த நேரத்தில் நிதி திவாரி தொலைபேசியில் யாருடனோ பேசிக் கொண்டிருந்ததாக குடும்பத்தினர் தரப்பில் கூறப்படுகிறது. இருப்பினும், அவரது இறப்பிற்கான உண்மையான காரணம் குறித்து எவ்வித முடிவிற்கும் வர வேண்டாம் என்றும், விசாரணைக்குப் பிறகே முழுமையான விவரங்கள் தெரியும் என்றும் காவல்துறை தெரிவித்துள்ளார்.
தற்போது மோர்வா காவல் நிலைய அதிகாரி டாக்டர் ஞானேந்திர சிங் தலைமையிலான காவல்துறையினர் வழக்குப்பதிவு செய்து விசாரணை நடத்தி வருகின்றனர். இதற்காக நிதி திவாரியின் அழைப்புப் பதிவுகள், டிஜிட்டல் செயல்பாடுகள் மற்றும் குடும்பத்தினர், நண்பர்களிடமிருந்து தகவல்கள் சேகரிக்கப்பட்டு வருகின்றன. அவரது திறமையையும், தன்னம்பிக்கையையும் பாராட்டி தினமும் கருத்துகளைப் பதிவிட்டு வந்த பல்லாயிரக்கணக்கான ரசிகர்கள் மற்றும் பின்தொடர்பாளர்கள், அவரது மறைவுச் செய்தியைக் கேட்டு அதிர்ச்சியடைந்து சமூக வலைதளங்களில் தங்களது ஆழ்ந்த இரங்கல்களைத் தெரிவித்து வருகின்றனர்.