லக்னோவில் தேநீர் குடித்ததற்கான ரூ.40 கட்டணத்தைச் செலுத்த மறுத்து, தான் ஒரு ஐபிஎஸ் அதிகாரி எனப் பொய் கூறி மிரட்டிய நபர் ஒருவர் காவல்துறையினரால் கைது செய்யப்பட்டுள்ளார். தேநீர்க் கடைக்காரரிடம் பணம் தருவதற்குப் பதிலாக, தனக்கு “சல்யூட்” அடிக்குமாறு அந்த நபர் திமிராகப் பேசியுள்ளார். இதனால் சந்தேகமடைந்த கடைக்காரர் மற்றும் அங்கிருந்தவர்கள் போலீசாருக்குத் தகவல் கொடுத்தனர்.
தகவலறிந்து சம்பவ இடத்திற்கு வந்த லக்னோ போலீசார், அந்த நபரிடம் விசாரணை நடத்தினர். அப்போது அவர் முன்னுக்குப் பின் முரணாகப் பேசியதால், அவர் ஒரு போலி அதிகாரி என்பது அம்பலமானது. உடனடியாக போலீசார் அவரைத் தீவிர விசாரணைக்காகக் காவல் நிலையத்திற்கு அழைத்துச் சென்று கைது செய்தனர். இது தொடர்பான வீடியோ சமூக வலைதளங்களில் வெளியாகி வைரலாகி வருகிறது.
விசாரணையில், கைதான நபர் கான்பூரைச் சேர்ந்த அங்கித் மிஸ்ரா என்பது தெரியவந்தது. ஆடம்பரமாக வாழ்வதற்காகவும், மற்றவர்களை மிரட்டிப் பணம் பறிப்பதற்காகவும் அவர் ஐபிஎஸ் அதிகாரி போல நடித்து ஏமாற்றி வந்துள்ளார். அவரிடமிருந்த போலி அடையாள அட்டைகள் மற்றும் பொருட்களைப் பறிமுதல் செய்த போலீசார், அவர் மீது பல்வேறு பிரிவுகளின் கீழ் வழக்குப் பதிவு செய்து தீவிர விசாரணை மேற்கொண்டு வருகின்றனர்.