தமிழகத்தில் 2026 சட்டமன்றத் தேர்தல் நெருங்கி வரும் சூழலில், கடந்த 2021 தேர்தலைப் போலவே இந்த முறையும் 5 சவரன் வரை அடகு வைக்கப்பட்ட நகைக்கடன் தள்ளுபடி செய்யப்படும் என்ற எதிர்பார்ப்பு பொதுமக்கள் மத்தியில் பலமாக எழுந்துள்ளது. ஏழை மற்றும் நடுத்தர வர்க்கத்தினர் இந்த அறிவிப்பை ஆவலுடன் எதிர்பார்த்துக் காத்திருக்கின்றனர். நேற்று நடைபெற்ற தி.மு.க.வின் பிரம்மாண்ட மாநாட்டில், முதல்வர் மு.க. ஸ்டாலின் இது குறித்த முக்கிய அறிவிப்பை வெளியிடுவார் என்று பெரிதும் எதிர்பார்க்கப்பட்டது. ஆனால், மாநாட்டு உரையில் இது போன்ற கடன் தள்ளுபடி குறித்த அறிவிப்புகள் ஏதும் இடம் பெறாதது பொதுமக்களிடையே ஒருவித ஏமாற்றத்தை ஏற்படுத்தியுள்ளது.
இருப்பினும், தேர்தல் களம் சூடுபிடிக்கத் தொடங்கியுள்ள நிலையில், திமுக அரசு தனது தேர்தல் வாக்குறுதிகளில் ஒன்றாக இதை அறிவிக்க வாய்ப்புள்ளதாக அரசியல் வட்டாரங்கள் தெரிவிக்கின்றன. விரைவில் நடைபெறவுள்ள அரசு விழாக்களிலோ அல்லது தேர்தல் அறிக்கை வெளியிடும் போதோ, 5 சவரன் வரையிலான நகைக்கடன் தள்ளுபடி குறித்த அதிகாரப்பூர்வ அறிவிப்பு வெளியாகலாம் என நம்பப்படுகிறது. எதிர்க்கட்சிகளின் விமர்சனங்களைச் சமாளிக்கவும், மக்களின் வாக்குகளைக் கவரவும் இந்த அறிவிப்பு ஒரு முக்கிய துருப்புச் சீட்டாக இருக்கும் என்பதால், பொதுமக்கள் தொடர்ந்து அரசின் அடுத்தகட்ட நகர்வுகளை உற்றுநோக்கி வருகின்றனர்.