மதுரை முனிச்சாலை சந்திப்பில் நடைபெற்ற அதிமுக தேர்தல் பிரச்சாரக் கூட்டத்தில் பேசிய முன்னாள் அமைச்சர் செல்லூர் ராஜு, 2026-ஆம் ஆண்டு சட்டமன்றத் தேர்தலில் அதிமுக வெற்றி பெற்று ஆட்சி அமைத்தவுடன் தமிழகத்தில் மதுவிலக்கு அமல்படுத்தப்படும் என்று அதிரடியாகத் தெரிவித்தார். தமிழகத்தில் மது அரக்கனை ஒழிப்பதே அதிமுகவின் முக்கிய இலக்கு என்றும், எடப்பாடி பழனிசாமி முதல்வராகப் பொறுப்பேற்றதும் மதுக்கடைகளை மூடுவதற்கான கோப்பில்தான் தனது முதல் கையெழுத்தைப் போடுவார் என்றும் அவர் உறுதிபடக் கூறினார்.
திமுக அரசு மீது கடுமையான விமர்சனங்களை முன்வைத்த செல்லூர் ராஜு, தேர்தல் நேரத்தில் கொடுத்த வாக்குறுதிகளை நிறைவேற்றாமல் மக்களை திமுக ஏமாற்றிவிட்டதாகக் குற்றம் சாட்டினார். திமுக ஆட்சிக்கு வந்தால் மதுக்கடைகள் மூடப்படும் என்று கனிமொழி உள்ளிட்டோர் வாக்குறுதி அளித்ததாகவும், ஆனால் தற்போது தமிழகத்தில் மது விற்பனை மற்றும் பயன்பாடு பன்மடங்கு அதிகரித்துள்ளதாகவும் அவர் சுட்டிக்காட்டினார். மேலும், திமுக ஆட்சியில் வரி உயர்வு மற்றும் விலைவாசி உயர்வால் சாதாரண மக்கள் சொல்லொணாத் துயரத்திற்கு ஆளாகியிருப்பதாகவும் அவர் குறிப்பிட்டார்.
அதிமுகவின் தேர்தல் வாக்குறுதிகள் அடங்கிய துண்டுப் பிரசுரங்களை விநியோகித்த அவர், பெண்களுக்கு மாதந்தோறும் 2,000 ரூபாய் உதவித்தொகை, அம்மா இல்லம் திட்டம், 150 நாட்கள் வேலைவாய்ப்பு மற்றும் பெண்களுக்கு இருசக்கர வாகன மானியம் உள்ளிட்ட பல்வேறு மக்கள் நலத்திட்டங்களை அதிமுக செயல்படுத்தும் என்றார். அதிமுக எப்போதுமே சொன்னதைச் செய்யும், செய்வதைத் தான் சொல்லும் என்ற கொள்கையுடையது என்றும், வரும் தேர்தலில் மக்கள் அதிமுகவை ஆதரிக்க வேண்டும் என்றும் அவர் கேட்டுக் கொண்டார்.
தமிழகத்தில் போதைப்பொருட்களின் நடமாட்டம் அதிகரித்துள்ளதாகவும், இதனால் இளைஞர்களின் எதிர்காலம் கேள்விக்குறியாகியுள்ளதாகவும் அவர் வேதனை தெரிவித்தார். அதிமுக ஆட்சிக்காலத்தில் கொண்டு வரப்பட்ட மருத்துவக் கல்லூரிகள் போன்ற வளர்ச்சித் திட்டங்களைச் சுட்டிக்காட்டிய அவர், மது இல்லாத தமிழகத்தை உருவாக்கி இளம்பெண்கள் விதவையாவதைத் தடுப்பதே எடப்பாடி பழனிசாமியின் நோக்கம் என்று கூறி தனது உரையை நிறைவு செய்தார்.