அதிமுக தற்போதைய அரசியல் சோதனைகளில் இருந்து விரைவிலேயே மீண்டெழுந்து, எதிர்வரும் தேர்தல்களில் மகத்தான வெற்றியைப் பெறும் என்று கட்சியின் பொதுச்செயலாளர் எடப்பாடி பழனிசாமி தொண்டர்களுக்கு நம்பிக்கை தெரிவித்துள்ளார். கழகம் தற்போதைய சூழ்நிலையில் இருந்து விடுபட்டு, மீண்டும் எழுச்சி பெறுவதற்குத் தேவையான அனைத்து சட்டப்பூர்வ மற்றும் அரசியல் நடவடிக்கைகளையும் தாம் தொடர்ந்து மேற்கொண்டு வருவதாக அவர் உறுதியளித்துள்ளார். இந்த மீட்சிப் பயணத்திற்கு கழக நிர்வாகிகளும், கோடானு கோடி தொண்டர்களும் தங்களின் முழு ஒத்துழைப்பை நல்க வேண்டும் என்று அவர் அன்போடு கேட்டுக்கொண்டுள்ளார்.
கழகத்தின் வரலாற்றுப் பாதையை சுட்டிக்காட்டியுள்ள அவர், அதிமுகவின் நிறுவனத் தலைவர் எம்.ஜி.ஆர் மற்றும் முன்னாள் முதலமைச்சர் ஜெயலலிதா ஆகியோர் தங்களின் அரசியல் பயணத்தில் எண்ணற்ற சோதனைகளையும், துரோகங்களையும் கடந்துதான் கட்சியை வெற்றிப் பாதைக்கு அழைத்துச் சென்றனர் என்பதை நினைவு கூர்ந்துள்ளார். குறிப்பாக, 1996 சட்டமன்றப் பொதுத் தேர்தலில் வெறும் 4 இடங்களில் மட்டுமே வெற்றி பெற்று சோதனையைச் சந்தித்தபோதும், ஜெயலலிதா அவர்கள் துணிச்சலோடு துரோகங்களை எதிர்கொண்டு மீண்டும் ஆட்சிக் கட்டிலில் அமர வைத்தார் என்ற வரலாற்று உண்மையையும் எடப்பாடி பழனிசாமி தனது அறிக்கையில் பதிவிட்டுள்ளார்.
அதிமுகவில் பல்வேறு பதவி சுகங்களை அனுபவித்துவிட்டு, இன்று கட்சியை அழிப்பதற்கான செயல்களில் ஒருசிலர் ஈடுபட்டு வருவதாகக் குறிப்பிட்ட அவர், அவர்களின் சதித் திட்டங்கள் ஒருபோதும் ஈடேறாது என்று எச்சரித்துள்ளார். கட்சியின் தற்போதைய நிலையை எண்ணி, தஞ்சாவூர் கிழக்கு மாவட்ட வர்த்தக அணி இணைச் செயலாளர் K.S. மகேந்திரன் என்பவர் தன் இன்னுயிரை மாய்த்துக்கொண்ட செய்தி தமக்கு மிகுந்த வேதனையை அளித்துள்ளதாகக் குறிப்பிட்டுள்ள அவர், அரசியல் களத்தில் வெற்றி, தோல்வி என்பது மாறி மாறி வரக்கூடிய ஒன்று என்பதால் தொண்டர்கள் யாரும் எவ்வித விபரீதமான செயல்களிலும் ஈடுபட வேண்டாம் என்று மன்றாடிக் கேட்டுக்கொண்டுள்ளார்.
“எனக்குப் பின்னாலும், இன்னும் எத்தனை நூற்றாண்டுகள் வந்தாலும் அனைத்திந்திய அண்ணா திராவிட முன்னேற்றக் கழகம் மக்களுக்காகவே இயங்கும்” என்ற மறைந்த ஜெயலலிதா அவர்களின் வரலாற்றுச் சிறப்புமிக்க எண்ணவோட்டத்தை மெய்ப்பித்துக் காட்ட அனைவரும் ஒன்றிணைய வேண்டும் என எடப்பாடி பழனிசாமி அழைப்பு விடுத்துள்ளார். எனவே, கழக நிர்வாகிகளும் தொண்டர்களும் தற்போதைய அரசியல் சூழ்நிலையைக் கண்டு எவ்வித அச்சத்திற்கும், பதற்றத்திற்கும் ஆளாகாமல், ஒற்றுமையுடன் பயணிக்குமாறு தனது அறிக்கையின் வாயிலாக அவர் வேண்டுகோள் விடுத்துள்ளார்.