தமிழகத்தில் சட்டமன்றத் தேர்தல் நெருங்கி வரும் வேளையில், அதிமுக தலைமையிலான தேசிய ஜனநாயகக் கூட்டணியில் தொகுதிப் பங்கீடு தொடர்பாக நிலவி வரும் இழுபறியைத் தொடர்ந்து, அக்கட்சியின் பொதுச்செயலாளர் எடப்பாடி பழனிசாமி இன்று அவசரமாக டெல்லி பயணம் மேற்கொள்கிறார். நேற்று மதுரையில் நடைபெற்ற கூட்டணியின் ஆலோசனைக் கூட்டத்தில் சுமுக முடிவு எட்டப்படாத நிலையில், இந்தத் திடீர் பயணம் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
மதுரையில் பிரதமர் மோடி பங்கேற்ற பொதுக்கூட்டத்திற்கு முன்னதாக, மத்திய அமைச்சர் பியூஷ் கோயல் முன்னிலையில் அதிமுக, பாஜக, பாமக உள்ளிட்ட கூட்டணிக் கட்சித் தலைவர்களிடையே பேச்சுவார்த்தை நடைபெற்றது. நீண்ட நேரம் நடைபெற்ற இந்த ஆலோசனையிலும் தொகுதிகளைப் பிரிப்பதில் உடன்பாடு ஏற்படவில்லை. குறிப்பாக, பாஜக அதிக இடங்களைக் கோருவதும், கூட்டணி கட்சிகளுக்கான இடங்களை பாஜகவே முடிவு செய்ய விரும்புவதும் எடப்பாடி பழனிசாமி தரப்புக்கு அதிருப்தியை ஏற்படுத்தியுள்ளதாகக் கூறப்படுகிறது.
பிரதமர் மோடி தமிழகத்திற்கு இருமுறை வந்து சென்ற பிறகும் கூட்டணி இடப்பங்கீடு இன்னும் இறுதி செய்யப்படாதது டெல்லி மேலிடத்திற்கு வருத்தத்தை அளித்துள்ளதாகத் தெரிகிறது. குறிப்பாக, உள்துறை அமைச்சர் அமித் ஷா இந்த இழுபறியால் அதிருப்தியில் இருப்பதாகவும், அதன் காரணமாகவே எடப்பாடி பழனிசாமிக்கு அழைப்பு விடுக்கப்பட்டுள்ளதாகவும் தகவல்கள் தெரிவிக்கின்றன. இன்று காலை சென்னையில் இருந்து டெல்லி புறப்பட்ட அவர், அங்கு அமித் ஷாவை நேரில் சந்தித்துப் பேசவுள்ளார்.
கடந்த தேர்தலில் பெற்ற இடங்களைக் காட்டிலும், தற்போது தங்களுக்குள்ள வாக்கு வங்கியைச் சுட்டிக்காட்டி பாஜக கூடுதல் தொகுதிகளைக் கோரி வருகிறது. அதேசமயம், அதிமுக தனது செல்வாக்கை நிலைநிறுத்திக் கொள்ள விரும்புகிறது. டெல்லியில் நடைபெறும் இந்தச் சந்திப்பின் மூலம் கூட்டணியின் தொகுதிப் பங்கீடு சிக்கலுக்கு இறுதித் தீர்வு காணப்படலாம் என்றும், அதன் பின்னரே அதிகாரப்பூர்வ அறிவிப்புகள் வெளியாகும் என்றும் எதிர்பார்க்கப்படுகிறது.