‘காதலன்’ படத்துக்கு தேசிய விருது கொடுத்தாங்க.. ஏன்டா வாங்குனோம்னு ஆகிடுச்சு.. editor லெனின் பகிர்ந்த சுவாரஸ்ய தகவல்..

பழம்பெரும் இயக்குனர் ஏ பீம்சிங்கின் மகன்களில் ஒருவரான பி லெனின் தமிழ் சினிமாவில் நூற்றுக்கும் மேற்பட்ட படங்களுக்கு படத் தொகுப்பாளராக பணியாற்றியுள்ளார். ஆரம்பத்தில் இயக்குனர் வி டி விஜயனோடு இணைந்து எடிட்டராக பணியாற்றிய அவர் பின்னர் தனியாகவும் பல படங்களுக்கு எடிட்டராக பணியாற்றியுள்ளார். மகேந்திரன் இயக்கத்தில் உருவான உதிரிப்பூக்கள் திரைப்படத்தின் மூலமாக படத்தொகுப்பாளராக அறிமுகமானார்.

நாயகன், கீதாஞ்சலி, அஞ்சலி மற்றும் காதலன் ஆகிய படங்களுக்காக தேசிய விருது வாங்கியுள்ளார். இந்நிலையில் காதலன் திரைப்படத்துக்காக தனக்கு தேசிய விருது கொடுத்தது சம்மந்தமாக ஒரு சுவாரஸ்ய தகவலை அவர் பகிர்ந்துள்ளார்.

ஒரு நேர்காணலில் “காதலன் படத்துக்கான எனக்கு தேசிய விருது கொடுத்தார்கள். நானும் வாங்கி வந்துவிட்டேன். அதன் பிறகுதான் எனக்கு ஏன் தேசிய விருது கொடுத்தார்கள் என்பது பற்றி தெரியவந்தது. அந்த படத்தில் இடம்பெற்ற முக்காலா பாடலில் பிரபுதேவா நடனமாடும் போது, அவரின் கை, கால், கழுத்து எல்லாம் இல்லாமல் ஆடுவது போன்று காட்சிகள் இருக்கும். இது அப்போது மிகவும் ஆச்சர்யமாக ரசிகர்களால் பார்க்கப்பட்டது.

அந்த காட்சிகளை சிறப்பாக எடிட் செய்தததால்தான் உங்களுக்கு தேசிய விருது கொடுக்கப்பட்டது எனக் கூறினர். அப்போதுதான் எனக்கு அதிர்ச்சியானது. ஏனென்றால் அந்த மேஜிக் எல்லாம் கம்ப்யூட்டர் கிராபிக்ஸ் மூலம் பண்ணப்பட்டது. அது தெரியாமல் எனக்கு தேசிய விருது கொடுத்தார்கள் என்பதால் எனக்கு அந்த விருதை திருப்பித் தந்துவிடலாமா என்று கூட தோன்றியது” எனக் கூறியுள்ளார்.

காதலன் திரைப்படத்தின் போதுதான் கம்ப்யுட்டர் கிராபிக்ஸ் இந்தியாவில் அறிமுகமான காலகட்டம். அப்போது அதைப் பற்றிய அறிவு பலருக்கும் தெரியாமல் இருந்தது. அதனால் கம்ப்யூட்டர் கிராபிக்ஸுக்கும் எடிட்டிங்குக்கும் வித்தியாசம் தெரியாமல் காதலன் படத்தில் தேசிய விருது லெனினுக்கு வழங்கப்பட்டுள்ளது.