கொங்கு மண்டல மையமான சேலத்தில் நடைபெற்ற பேரறிஞர் அண்ணா பிறந்தநாள் பொதுக்கூட்டத்தில், அதிமுக பொதுச்செயலாளர் எடப்பாடி பழனிசாமி தமிழக வெற்றி கழக அரசு மீது மிகக் காரசாரமான விமர்சனங்களை முன்வைத்துள்ளார். தேர்தலுக்கு முன்பாகவே ஆதவ் அர்ஜுனா தன்னை நேரில் சந்தித்து, அதிமுகவில் துணைப் பொதுச்செயலாளர் பதவி கேட்டதாக அவர் அதிரடியாகத் தெரிவித்தார். “அதிமுகவில் பதவிகள் விற்பனைக்கு அல்ல, உழைப்பவர்களுக்கே அங்கீகாரம் வழங்கப்படும்” எனத் தெளிவுபடுத்தியதால், அவர் தவெகவிற்குச் சென்று அக்கட்சியையே குத்தகைக்கு எடுத்துவிட்டதாக எடப்பாடி பழனிசாமி பகிரங்கமாகக் குற்றம்சாட்டினார்.
ஆட்சிக்கு வந்து நான்கு மாதங்கள் கடந்துவிட்ட நிலையிலும், அரிசி மற்றும் பருப்பு உள்ளிட்ட அத்தியாவசியப் பொருட்களின் விலை 40 சதவீதம் வரை உயர்ந்து மக்கள் அவதிப்பட்டு வருவதாக அவர் சாடினார். மக்கள் நலனில் அக்கறையின்றி, வெறும் சமூக ஊடக ‘ரீல்ஸ்’ விளம்பரங்களை மட்டுமே மூலதனமாகக் கொண்டு தவெக ஆட்சிக்கு வந்ததாக விமர்சித்த அவர், நிர்வாகச் சீர்கேட்டால் எவ்விதப் புதிய திட்டங்களும் செயல்படுத்தப்படவில்லை எனக் குறிப்பிட்டார். மேலும், கரூர் கூட்ட நெரிசல் சம்பவத்தின் போது வீர வசனம் பேசியவர்கள் வெளிமாநிலத்திற்குச் தப்பி ஓடிவிட்டதாகவும், கட்சித் தலைமை அலுவலகமே 15 நாட்களுக்குப் பூட்டப்பட்டுக் கிடந்ததாகவும் சுட்டிக்காட்டினார்.
மாநிலத்தின் நிதியாதாரம் மோசமாக உள்ள நிலையில், தவெக அரசின் வீண் ஆடம்பரச் செலவுகளையும் எடப்பாடி பழனிசாமி கடுமையாகச் சாடினார். அண்ணா, கருணாநிதி, எம்.ஜி.ஆர், ஜெயலலிதா போன்ற பெரும் தலைவர்கள் பணியாற்றிய தலைமைச் செயலக அறை போதவில்லை என்று கூறி, நாமக்கல் கவிஞர் மாளிகையில் ரூ.10 கோடியில் புதிய அறை அமைப்பதும், பட்டினப்பாக்கத்தில் ரூ.1,200 கோடி செலவில் புதிய தலைமைச் செயலகம் கட்ட முற்படுவதும் தேவையற்ற விரயம் என்று கண்டித்தார். ரூ.10 லட்சம் கோடி கடனில் இயங்கும் ஒரு மாநில அரசு, ஆண்டுக்கு ரூ.78,000 கோடி வட்டி கட்டும் சூழலில் இதுபோன்ற ஆடம்பரங்கள் தேவையா என்ற கேள்வியையும் அவர் எழுப்பினார்.
தற்போதைய சட்டப்பேரவை ஒரு விவாதக் களமாக இல்லாமல் பட்டிமன்றம் போல மாறிவிட்டது என்று வருத்தம் தெரிவித்த அவர், தவெக அரசு கூட்டணி கட்சிகளின் தயவிலேயே இயங்கி வருவதை நினைவுறுத்தினார். அரசுக்கு ஆதரவு அளித்த கம்யூனிஸ்ட் கட்சியின் மாநிலச் செயலாளர் சண்முகமே தற்போது பகிரங்க விமர்சனங்களை முன்வைத்து வருவதைச் சுட்டிக்காட்டிய அவர், கூட்டணிக் கட்சிகள் எப்போது வேண்டுமானாலும் ஆதரவை வாபஸ் பெறக்கூடும் என்றும், இதனால் தவெக அரசு எந்த நேரத்திலும் கவிழும் அபாயத்தில் உள்ளது என்றும் எச்சரித்தார்.