அதிமுக பொதுச் செயலாளர் எடப்பாடி பழனிசாமி திருச்சியில் செய்தியாளர்களைச் சந்தித்து தற்போதைய தமிழக அரசு மற்றும் புதிதாக உருவான தமிழக வெற்றிக் கழகத்தின் செயல்பாடுகளைக் கடுமையாக விமர்சித்துள்ளார். முதலமைச்சரின் அலுவலகப் பணி நேரம் குறித்தும், கடந்த சில மாதங்களில் வாங்கப்பட்ட கடன் குறித்தும் அவர் கடுமையான குற்றச்சாட்டுகளை முன்வைத்தார். ரீல்ஸும் விளம்பரங்களும் மட்டுமே இந்த ஆட்சியின் அஸ்திவாரம் என்றும், மக்கள் நலனுக்காக எந்தவொரு ஆக்கப்பூர்வமான திட்டமும் இதுவரை செயல்படுத்தப்படவில்லை என்றும் அவர் சாடினார்.
சட்டம்-ஒழுங்கு சந்தி சிரிக்கிறது என்றும், மாநிலத்தில் கொலை, கொள்ளை மற்றும் திருட்டுச் சம்பவங்கள் அதிகரித்துவிட்டதாகவும் எடப்பாடி பழனிசாமி குற்றம் சாட்டினார். பெற்றோர்கள் தங்கள் குழந்தைகளைப் பள்ளிக்கு அனுப்பவே பயப்படும் சூழல் உருவாகியுள்ளதாகவும், சிறைகளில் இருந்து குற்றவாளிகள் எளிதில் தப்பி ஓடுவதாகவும் அவர் கவலை தெரிவித்தார். மேலும், கடந்த ஆறு மாதங்களில் நாற்பதாயிரம் கோடி ரூபாய் கடன் வாங்கியதே இந்த அரசின் ஒரே சாதனை என்றும், தவெக அதிர்ஷ்டவசமாக ஜாக்பாட்டில் வந்த கட்சி என்றும் அவர் விமர்சித்தார்.
தமது ஆட்சிக்காலத்தில்தான் விமான நிலைய விரிவாக்கத்திற்காக நிலம் ஒதுக்கப்பட்டது, ஒரே ஆண்டில் 11 அரசு மருத்துவக் கல்லூரிகள் மற்றும் கலைக் கல்லூரிகள் தொடங்கப்பட்டன உள்ளிட்ட பல்வேறு சாதனைகள் நிறைவேற்றப்பட்டதாக அவர் பட்டியலிட்டார். ஆனால், தற்போதைய ஆட்சியோ அல்லது தவெக ஆட்சியோ மக்களுக்கு எந்த நன்மையும் செய்யவில்லை என்றும், காவிரி குண்டாறு திட்டம் போன்ற பல திட்டங்கள் ஆக்கப்பூர்வமாகச் செயல்படுத்தப்படவில்லை என்றும் அவர் குற்றம் கூறினார்.
மதுரை மீனாட்சி அம்மன் கோயிலில் தரிசனத்தின் போது ஏற்பட்ட மின்வெட்டு சம்பவத்தைக் சுட்டிக்காட்டிய அவர், மின்வெட்டு பிரச்சினைக்கு உடனடியாகத் தீர்வு காணப்பட வேண்டும் என்று வலியுறுத்தினார். மேலும், கட்சியில் இருந்து நீக்கப்படுபவர்கள் குறித்த நடவடிக்கைகளில் தெளிவு இருக்க வேண்டும் என்றும், ஊடகங்களின் பரபரப்புச் செய்திகளுக்காக அதிமுகவைப் பயன்படுத்த வேண்டாம் என்றும் அவர் கேட்டுக்கொண்டார்.