தமிழகத்தில் 2026 ஆம் ஆண்டு சட்டமன்றத் தேர்தல் நடைபெற உள்ள நிலையில் அனைத்து கட்சிகளும் தீவிரமாக அரசியல் பணிகளில் ஈடுபட்டு வருகின்றன. மீண்டும் தமிழகத்தில் திமுக ஆட்சி தான் அமைய வேண்டும் என்ற நிலைப்பாட்டில் உள்ள முதல்வர் ஸ்டாலின் மக்களை கவரும் வகையில் புதுப்புது திட்டங்களையும் பல அறிவிப்புகளையும் வெளியிட்டு வருகின்றார். அதே சமயம் நாளை முதல் உங்களுடன் ஸ்டாலின் என்ற புதிய திட்டம் தமிழகத்தில் தொடங்க உள்ளது. இந்தத் திட்டத்தின் மூலம் மக்களின் தேவைகள் அனைத்தும் பூர்த்தி செய்யப்பட உள்ளதாக அறிவிக்கப்பட்டுள்ளது.
இப்படியான நிலையில் சேலம் மாவட்டத்தில் நடைபெற்ற நிகழ்ச்சியில் கலந்து கொண்ட பிறகு செய்தியாளர்களை சந்தித்து பேசிய அதிமுக பொதுச்செயலாளர் எடப்பாடி பழனிச்சாமி, அதிமுக மற்றும் பாஜக கூட்டணி மிக வலுவாக உள்ளது. திமுக கூட்டணி வலுவாக இருக்கிறதா என உதயநிதி பார்த்து சொல்லட்டும். என் சுற்றுப்பயணம் மிகுந்த எழுச்சியுடன் நடைபெற்று வருகிறது. போகுமிடமெல்லாம் திமுக ஆட்சி இருக்கக் கூடாது என்று தான் மக்கள் கூறுகிறார்கள். அடுத்த வருடம் தேர்தல் வருவதால் திமுக நடத்தும் நாடகம் தான் உங்களுடன் ஸ்டாலின் திட்டம். நான்கு ஆண்டுகளாக ஒன்றுமே செய்யாமல் இப்போது குறைகளை கேட்டு வருகிறார்கள். இதெல்லாம் அப்பட்டமான நாடகம் என்று இபிஎஸ் விமர்சித்துள்ளார்.