அசாம் முதல்வர் ஹிமாந்தா பிஸ்வா சர்மாவின் மனைவி ரிங்கி புயான் சர்மா மீது காங்கிரஸ் செய்தித் தொடர்பாளர் பவன் கெர்ரா ஊழல் புகார்களை முன்வைத்ததைத் தொடர்ந்து, அரசியல் களம் சூடுபிடித்துள்ளது. ரிங்கி புயான் மூன்று பாஸ்போர்ட்டுகளை வைத்துள்ளதாகவும், அவரது சொத்து விவரங்களை முதல்வர் தனது வேட்புமனுவில் மறைத்துவிட்டதாகவும் பவன் கெர்ரா குற்றம் சாட்டினார்.
இது குறித்துப் பேசிய காங்கிரஸ் தலைவர் மல்லிகார்ஜுன கார்கே, மத்திய அரசின் விசாரணை அமைப்புகள் இந்த விவகாரம் குறித்து முழுமையான விசாரணை நடத்த வேண்டும் என்று வலியுறுத்தினார். காங்கிரஸ் தலைவர்களின் இந்த விமர்சனங்களுக்குப் பதிலடி கொடுத்த முதல்வர் ஹிமாந்தா சர்மா, மல்லிகார்ஜுன கார்கே வயதான காலத்தில் ஒரு “பைத்தியக்காரனைப் போல” பேசி வருவதாகக் கடுமையாகச் சாடினார்.
மேலும், ஆதாரமற்ற குற்றச்சாட்டுகளைக் கூறிவிட்டுத் தப்பியோடும் பவன் கெர்ராவை அசாம் போலீசார் பாதாளத்திற்கே சென்றாலும் விடமாட்டார்கள் என்றும், ராகுல் காந்தி கொடுத்த தவறான தகவல்களைக் கொண்டு இவர்கள் நாடகம் ஆடுவதாகவும் அவர் குற்றம் சாட்டினார். இந்த விவகாரத்தில் சட்டப்பூர்வ நடவடிக்கைகள் ராகுல் காந்தி வரை நீளும் என்றும் அவர் எச்சரித்துள்ளார்.