ஒரே வாரத்தில் உலகை உலுக்கிய 5 நிலநடுக்கங்கள்…. பூமிக்கு என்னாச்சு?…. விஞ்ஞானிகள் அதிர்ச்சி அறிக்கை…. உலக அழிவின் தொடக்கமா…?

உலகெங்கிலும் கடந்த ஒரு வாரத்தில் அடுத்தடுத்து ஏற்பட்ட சக்திவாய்ந்த நிலநடுக்கங்கள் மனிதகுலத்தைப் பெரும் அதிர்ச்சியில் ஆழ்த்தியுள்ளன. வெனிசுலாவில் ஒரே நொடிக்குள் ஏற்பட்ட 7.2 மற்றும் 7.5 ரிக்டர் அளவிலான இரட்டை நிலநடுக்கம் பெரும் பேரழிவை ஏற்படுத்தியுள்ளது. இதில் பல கட்டிடங்கள் தரைமட்டமாகி, இதுவரை 1,430 பேர் உயிரிழந்துள்ளனர்; 50,000-க்கும் மேற்பட்டோர் காணாமல் போயுள்ளனர். இதே வாரத்தில் வடக்கு கலிபோர்னியாவில் 5.6 ரிக்டர் அளவிலும், ஜப்பானின் வடக்கு கடற்கரையில் 7.2 ரிக்டர் அளவிலும் பலத்த அதிர்வுகள் பதிவாகின. இந்தத் தொடர் நிலநடுக்கங்கள் பசிபிக் மற்றும் அமெரிக்கப் பகுதிகளை மட்டுமன்றி, ஒட்டுமொத்த உலகையுமே அச்சத்தில் ஆழ்த்தின.

அமெரிக்க மற்றும் ஆசியக் கண்டங்களைத் தொடர்ந்து தெற்கு ஆசியப் பகுதிகளும் இந்த நிலநடுக்கப் பாதிப்பிலிருந்து தப்பவில்லை. பாகிஸ்தானின் பலோசிஸ்தான் மாகாணத்தில் சனிக்கிழமை அன்று 5.5 ரிக்டர் அளவில் நிலநடுக்கம் ஏற்பட்டு நூற்றுக்கும் மேற்பட்ட வீடுகள் சேதமடைந்தன. இதற்கு அடுத்த சில மணி நேரங்களிலேயே ஆப்கானிஸ்தானின் ஹிந்து குஷ் பகுதியை மையமாகக் கொண்டு 6.2 ரிக்டர் அளவில் மற்றொரு நிலநடுக்கம் ஏற்பட்டது. இதன் அதிர்வுகள் ஆப்கானிஸ்தான், பாகிஸ்தான் மட்டுமன்றி இந்தியாவின் வடபகுதிகள் வரையிலும் உணரப்பட்டன. அதிர்ஷ்டவசமாக தெற்கு ஆசிய நிலநடுக்கங்களில் பெரிய அளவில் உயிர்ச்சேதங்கள் எதுவும் பதிவாகவில்லை என்றாலும், உலக மக்கள் மத்தியில் இது கடுமையான பீதியை ஏற்படுத்தியுள்ளது.

ஒரே வாரத்தில் உலகின் பல்வேறு கோணங்களில் அடுத்தடுத்து நிலநடுக்கங்கள் ஏற்பட்டதால், இவை அனைத்தும் ஒன்றுடன் ஒன்று தொடர்புடையவையா என்ற கேள்வி பரவலாக எழுந்துள்ளது. இதைப் புரிந்துகொள்ள பூகம்பங்களின் அறிவியல் பின்னணியை ஆராய வேண்டும். பூமியின் வெளிப்புற அடுக்கு ‘டெக்டானிக் பிளேட்கள்’ எனப்படும் பிரம்மாண்ட பாறைத் தட்டுகளால் ஆனது. இந்தத் தட்டுகள் ஆண்டுக்கு சில சென்டிமீட்டர் வேகத்தில் தொடர்ந்து நகர்ந்துகொண்டே இருக்கும். அவை ஒன்றோடொன்று மோதும்போதோ அல்லது உரசிச் செல்லும்போதோ ஏற்படும் கடுமையான அழுத்தத்தின் காரணமாக பாறைகள் திடீரென நழுவி, பூமியில் பயங்கர அதிர்வுகளை ஏற்படுத்துகின்றன. இதுவே நாம் காணும் பூகம்பமாக மாறுகிறது.

இந்தத் தொடர் நிலநடுக்கங்கள் பற்றி புவியியல் ஆய்வாளர்கள் கூறுகையில், இவை அனைத்தும் ஒரே வாரத்தில் நடந்திருந்தாலும், வெவ்வேறு டெக்டானிக் பிளேட் எல்லைகளில் தனித்தனியாக நிகழ்ந்தவை என்று தெளிவுபடுத்துகின்றனர். பாகிஸ்தான் மற்றும் ஆப்கானிஸ்தான் நிலநடுக்கங்கள் இந்திய மற்றும் யூரேசிய பிளேடுகள் மோதுவதால் ஏற்பட்டவை; வெனிசுலா நிலநடுக்கம் கரீபியன் மற்றும் தென் அமெரிக்க பிளேடுகளின் எல்லையில் உருவானது. பல்லாயிரம் கிலோமீட்டர் தொலைவில் உள்ள இந்தத் தனித்தனி அமைப்புகளுக்கு இடையே நேரடித் தொடர்பு ஏதுமில்லை என்பதால், விஞ்ஞானிகள் இதனை ஒரு “தற்செயலான நிகழ்வு” என்றே கருதுகின்றனர். பூகம்பங்கள் தினமும் பூமியில் நிகழ்ந்து கொண்டுதான் இருக்கின்றன, ஆனால் அவை மக்கள் வசிக்கும் பகுதிகளில் அடுத்தடுத்து ஏற்படும் போது மட்டுமே நமது கவனத்தை ஈர்க்கின்றன என்பதே நிதர்சனமான உண்மையாகும்.