காரணமின்றி கணவருடன் உடலுறவு கொள்ளத் தொடர்ச்சியாக மறுப்பது அதற்கு சமம்… உச்சநீதிமன்றம் அதிரடி உத்தரவு…!!

நியாயமான காரணமின்றி கணவருடன் உடலுறவு கொள்ளத் தொடர்ச்சியாக மறுப்பது மனரீதியான கொடுமைக்குச் சமம் எனக் கூறி, 15 ஆண்டுகளுக்கும் மேலாகப் பிரிந்து வாழ்ந்த அரசு மருத்துவர்களான தம்பதிக்கு உச்ச நீதிமன்றம் விவாகரத்தை உறுதி செய்துள்ளது. கடந்த 2007-ல் திருமணமான இவர்களுக்குக் குழந்தைகள் இல்லாத நிலையில், தங்களின் இரு ஆண்டு திருமண வாழ்க்கையில் வெறும் 2 முதல் 3 மாதங்கள் மட்டுமே இணைந்து வாழ்ந்துள்ளனர் என்று கணவர் தரப்பில் தெரிவிக்கப்பட்டது. இந்தத் தம்பதிக்குக் குடும்ப நீதிமன்றம் முதலில் விவாகரத்து மறுத்த போதிலும், ராஜஸ்தான் உயர் நீதிமன்றம் 2025 பிப்ரவரியில் இவர்களுக்கு விவாகரத்து வழங்கி உத்தரவிட்டது. இதை எதிர்த்து மனைவி தொடர்ந்த மேல்முறையீட்டு வழக்கை விசாரித்த உச்ச நீதிமன்ற நீதிபதிகள் சஞ்சய் கரோல் மற்றும் அகஸ்டின் ஜார்ஜ் மாசிஹ் அடங்கிய அமர்வு, உயர் நீதிமன்றத் தீர்ப்பை முழுமையாக உறுதி செய்தது என்று வர்டிக்டம் தளம் குறிப்பிட்டுள்ளது.

திருமணம் என்பது வெறும் சட்டப்பூர்வ ஒப்பந்தம் அல்ல, அது பரஸ்பர மரியாதை மற்றும் பகிரப்பட்ட பொறுப்புகளின் அடிப்படையிலானது என்று குறிப்பிட்ட உச்ச நீதிமன்றம், உடலுறவு சார்ந்த நெருக்கத்தைத் தடுத்து வைப்பது திருமணத்தின் அடித்தளத்தையே சிதைத்துவிடும் என்று விளக்கியுள்ளது. மேலும், 15 ஆண்டுகளுக்கும் மேலாகப் பிரிந்து வாழும் தம்பதியரிடையே சமரசம் ஏற்பட வாய்ப்பில்லை என்றும், இத்தகைய “இறந்துபோன பந்தத்தை” காகிதத்தில் மட்டும் நீட்டிக்கச் செய்வது இருதரப்பிற்கும் மன வேதனையையே மிச்சப்படுத்தும் என நீதிமன்றம் சுட்டிக்காட்டியுள்ளது. எனவே, இந்தத் திருமண உறவு முழுமையாக முறிந்துவிட்டதைக் கருத்தில் கொண்டு, தங்களுக்குள்ள பிரத்யேக அரசியலமைப்புச் சட்டப் பிரிவு 142-ன் கீழ் உள்ள அதிகாரத்தைப் பயன்படுத்தி உச்ச நீதிமன்றம் இந்த விவாகரத்து உத்தரவைப் பிறப்பித்துள்ளது.