அமெரிக்கா மற்றும் இஸ்ரேல் படைகள் இணைந்து ஈரான் மீது நடத்தி வரும் தாக்குதல்கள், தற்போது உலகப்போருக்கான அறிகுறியாக உருவெடுத்துள்ளன. ஈரானின் உச்ச தலைவர் அயத்துல்லா அலி கமேனி கொல்லப்பட்டதைத் தொடர்ந்து, ஈரான் தனது பதிலடியை அண்டை நாடுகளான சவுதி அரேபியா, ஐக்கிய அரபு எமிரேட்ஸ், கத்தார் மற்றும் ஜோர்டான் போன்ற வளைகுடா நாடுகள் மீது ஏவுகணை மற்றும் ட்ரோன் மூலம் நடத்தியுள்ளது. ஈரானின் இந்தத் திடீர் நடவடிக்கை, இதுவரை போரில் நடுநிலைமை வகித்து வந்த அரபு நாடுகளை ஆத்திரமடையச் செய்துள்ளதாக அமெரிக்க அதிபர் டொனால்ட் ட்ரம்ப் தெரிவித்துள்ளார்.
ஈரானின் இந்தத் தாக்குதலை “மிகப்பெரிய ஆச்சரியம்” என்று வர்ணித்துள்ள ட்ரம்ப், வளைகுடா நாடுகளின் குடியிருப்புப் பகுதிகள் மற்றும் ஹோட்டல்கள் மீது ஈரான் குண்டுகளை வீசியது அந்த நாடுகளின் நிலைப்பாட்டை மாற்றியுள்ளதாகக் குறிப்பிட்டுள்ளார். “ஆரம்பத்தில் தயக்கம் காட்டிய அரபு நாடுகள், இப்போது ஈரானுக்கு எதிரான ராணுவ நடவடிக்கைகளில் எங்களுடன் இணைய விரும்புகின்றன,” என்று அவர் நேற்று ஊடகங்களுக்கு அளித்த பேட்டியில் உறுதிபடக் கூறினார். இதன் மூலம், மத்திய கிழக்கில் ஈரான் தனிமைப்படுத்தப்பட்டு, ஒரு வலுவான சர்வதேசக் கூட்டணி அதற்கு எதிராக உருவாகும் சூழல் ஏற்பட்டுள்ளது.
தாக்குதல்களின் தீவிரம் குறித்துப் பேசிய ட்ரம்ப், “பெரிய அலை இனிமேல்தான் வரப்போகிறது” என எச்சரித்துள்ளார். அமெரிக்காவின் தாக்குதல்கள் திட்டமிட்ட காலத்தை விட மிக நேர்த்தியாகவும் வேகமாகவும் நடந்து வருவதாகக் குறிப்பிட்ட அவர், உலகின் மிகப்பெரிய ராணுவ வலிமை தங்களிடம் இருப்பதை நினைவுபடுத்தினார். அடுத்த 4 முதல் 5 வாரங்களுக்கு இந்தத் தாக்குதல்கள் நீடிக்கக்கூடும் என்றும், தேவைப்பட்டால் எவ்வளவு காலம் வேண்டுமானாலும் போரைத் தொடரும் பொருளாதார மற்றும் ராணுவ பலம் அமெரிக்காவிற்கு இருப்பதாகவும் அவர் வெள்ளை மாளிகையில் உரையாற்றும்போது தெரிவித்தார்.
ஈரான் மீதான இந்தத் தொடர் தாக்குதல்கள் மத்திய கிழக்கு பிராந்தியத்தில் முன் எப்போதும் இல்லாத அளவு பதற்றத்தை அதிகரித்துள்ளது. அமெரிக்கா, இஸ்ரேல் மற்றும் தற்போது இணையத் துடிக்கும் அரபு நாடுகள் என முக்கோணக் கூட்டணி அமைந்தால், அது ஈரானின் ராணுவக் கட்டமைப்பை முழுமையாகச் சிதைக்கக்கூடும் என அரசியல் நோக்கர்கள் கருதுகின்றனர். உலக நாடுகளின் கண்கள் இப்போது மத்திய கிழக்கின் மீது நிலைத்துள்ள நிலையில், போர் மேலும் தீவிரமடைவது உலகப் பொருளாதாரத்திலும் பெரும் தாக்கத்தை ஏற்படுத்தும் என அஞ்சப்படுகிறது.