சென்னையில் குழாய் வழி எரிவாயு (PNG) மற்றும் சிஎன்ஜி (CNG) விநியோகம் செய்து வரும் டொரண்ட் கேஸ் (Torrent Gas) நிறுவனம், தற்போது எரிவாயு விலையை கிலோவுக்கு 2.50 ரூபாய் உயர்த்தி அதிரடி அறிவிப்பை வெளியிட்டுள்ளது. இந்த விலை உயர்வு இம்மாதம் முதல் நடைமுறைக்கு வந்துள்ள நிலையில், சென்னையில் ஒரு கிலோ சிஎன்ஜி-யின் விலை 91.50 ரூபாயாக அதிகரித்துள்ளது.
ஏற்கனவே ஈரான் மற்றும் இஸ்ரேல் இடையிலான போர் பதற்றம் காரணமாக உலக அளவில் கச்சா எண்ணெய் மற்றும் எரிவாயு சந்தையில் நிலையற்ற தன்மை நிலவி வரும் சூழலில், கடந்த 1-ஆம் தேதி வணிகப் பயன்பாட்டுக்கான கேஸ் சிலிண்டர் விலை 203 ரூபாய் வரை உயர்ந்தது பொதுமக்களிடையே பெரும் கவலையை ஏற்படுத்தியது. உள்நாட்டில் போதிய எரிபொருள் கையிருப்பு உள்ளதாகவும், தட்டுப்பாடு ஏற்பட வாய்ப்பில்லை என்றும் அரசு தரப்பில் தொடர்ச்சியாக விளக்கமளிக்கப்பட்டு வரும் அதே வேளையில், சர்வதேச காரணங்களைக் காட்டி அடிக்கடி மேற்கொள்ளப்படும் இந்த விலை உயர்வு சாமானிய மக்களின் மாதாந்திர பட்ஜெட்டையும், போக்குவரத்துச் செலவுகளையும் கடுமையாகப் பாதித்துள்ளது.