அமெரிக்காவின் மேரிலாண்ட் மாகாணத்தில் உள்ள பெல்காம்ப் பகுதியில், வீட்டில் யாரும் இல்லாத நேரத்தில் செல்லப் பிராணியான நாய் ஒன்று தவறுதலாக மின்சார அடுப்பை ஆன் செய்ததால் ஏற்பட்ட பெரும் தீ விபத்தில், மூன்று செல்லப் பிராணிகள் பரிதாபமாக உயிரிழந்துள்ளன. வீட்டின் உரிமையாளர்கள் வெளியே சென்றிருந்த வேளையில், ‘போ’ என்ற செல்ல நாய் சமையலறை மேடையின் மீது ஏறியபோது அங்கிருந்த டோஸ்டர் சுவிட்சை எதேச்சையாக அழுத்தியுள்ளது. இதனால் உருவான அதிகப்படியான வெப்பம், அருகில் இருந்த எரியக்கூடிய பொருட்கள் மீது பட்டு வீடு முழுவதும் மளமளவெனத் தீப்பற்றி எரிந்ததை அங்கிருந்த பாதுகாப்புக் கேமரா காட்சிகள் மூலம் தீயணைப்புத் துறையினர் உறுதி செய்துள்ளனர்.
தகவலறிந்து வந்த முப்பதுக்கும் மேற்பட்ட தீயணைப்பு வீரர்கள் சுமார் இருபது நிமிடங்கள் போராடித் தீயைக் கட்டுக்குள் கொண்டு வந்தனர். அக்கம் பக்கத்தினர் உடனடியாகச் செயல்பட்டு விபத்தை ஏற்படுத்திய ‘போ’ மற்றும் ‘ஆடி’ என்ற இரு நாய்களைப் பத்திரமாக மீட்டபோதிலும், துரதிர்ஷ்டவசமாக வீட்டிற்குள் சிக்கியிருந்த ‘டகோட்டா’ என்ற மற்றொரு நாயும் இரண்டு பூனைகளும் புகையில் மூச்சுத்திணறி பரிதாபமாக மடிந்தன. இந்த எதிர்பாராத விபத்தினால் வீட்டின் உள்கட்டமைப்பு மற்றும் வீட்டு உபயோகப் பொருட்கள் என இந்திய மதிப்பில் சுமார் 1.6 கோடி ரூபாய் ($200,000) அளவிற்குப் பெரும் சேதம் ஏற்பட்டுள்ளதாக அதிகாரிகள் கணக்கிட்டுள்ளனர்.