தினமும் டீ போடும் வீடுகளில் டீ வடிகட்டியில் கறை படிந்து, அதன் துளைகள் அடைந்து போவது மிகவும் சாதாரணமான ஒரு விஷயம். நாளடைவில் இந்த அடைப்புகளால் டீயை சரியாக வடிக்க முடியாமல் போவதுடன், அது பார்ப்பதற்கும் அசுத்தமாகத் தெரியும். பலர் இதைச் சுத்தம் செய்வது கடினம் என்று கருதி பழைய வடிகட்டியைத் தூக்கி எறிந்துவிட்டுப் புதியதை வாங்குவார்கள். ஆனால், நம் வீட்டிலேயே இருக்கும் சில பொருட்களைக் கொண்டு மிகக் குறைந்த செலவில் வடிகட்டியை மீண்டும் ஜொலிக்க வைக்க முடியும்.
விடாப்பிடியான கறைகளை நீக்க பேக்கிங் சோடா மற்றும் வினிகர் சிறந்த தீர்வாகும். ஒரு பாத்திரத்தில் சுடுநீரை எடுத்துக் கொண்டு, அதில் ஒரு ஸ்பூன் பேக்கிங் சோடா, சிறிது வினிகர் மற்றும் பாத்திரம் கழுவும் திரவம் (Dish soap) ஆகியவற்றைச் சேர்க்க வேண்டும். இந்தக் கலவையில் அழுக்கு படிந்த டீ வடிகட்டியை சுமார் 15 முதல் 20 நிமிடங்கள் வரை ஊற வைக்கவும். இப்படிச் செய்வதால் துளைகளில் ஒட்டியுள்ள டீத் தூள் மற்றும் கறைகள் தானாகவே இளகிவிடும்.
ஊறவைத்த பிறகு, ஒரு பழைய டூத் பிரஷ் அல்லது ஸ்க்ரப்பர் கொண்டு வடிகட்டியை மென்மையாகத் தேய்த்தால், கறைகள் அனைத்தும் எளிதில் வெளியேறிவிடும். குறிப்பாக, விளிம்புகளில் உள்ள அழுக்குகளை நீக்க பிரஷ் மிகவும் பயனுள்ளதாக இருக்கும். அதன் பிறகு சாதாரணத் தண்ணீரில் கழுவினால், அடைப்புகள் நீங்கி வடிகட்டி பளிச்சென்று மாறும். இது ரசாயனங்கள் அற்ற இயற்கை வழிமுறை என்பதால் ஆரோக்கியத்திற்கும் பாதுகாப்பானது.
ஒருவேளை உங்கள் டீ வடிகட்டி துருப்பிடிக்காத எஃகு (Stainless Steel) பொருளால் ஆனது என்றால், மற்றொரு எளிய முறையைத் தேர்வு செய்யலாம். வடிகட்டியைச் சிறுது நேரம் மிதமான தீயில் நேரடியாகக் காட்டினால், அதில் உள்ள காய்ந்த கறைகள் எரிந்து சாம்பலாகிவிடும். அதன் பிறகு சோப்பு நீரால் தேய்த்துக் கழுவினால், மின்னல் வேகத்தில் வடிகட்டி புத்தம் புதியது போல மாறும். இந்த எளிய குறிப்புகளைப் பின்பற்றுவதன் மூலம் தேவையற்ற செலவுகளைத் தவிர்த்துச் சமையலறைப் பொருட்களைச் சுத்தமாகப் பராமரிக்கலாம்.