“டாக்டரா.. இல்லை மிருகமா?”.. மயக்க மருந்து கொடுத்து 20 வயது பெண்ணை சீரழித்த டாக்டர்… ஆப்ரேஷன் தியேட்டரில் நடந்த கொடூரம்.. ஆவேசமடைந்த துணை முதல்வர்.. அதிரடி ஆக்ஷன்..!!

உத்தர பிரதேச மாநிலம் லக்னோவின் பக்ஷி-கா-தலாப் பகுதியில் உள்ள இந்தௌரபாக் என்ற இடத்தில் இருக்கும் ஒரு தனியார் மருத்துவமனையில், 12-ஆம் வகுப்பு படிக்கும் பள்ளி மாணவி ஒருவர் பாலியல் வன்கொடுமைக்கு ஆளாக்கப்பட்ட அதிர்ச்சி சம்பவம் வெளிச்சத்திற்கு வந்துள்ளது. பாதிக்கப்பட்ட மாணவி வலிப்பு நோய் மற்றும் மூச்சுத் திணறல் தொடர்பான சிகிச்சைக்காக கடந்த மே 19 அன்று இந்த மருத்துவமனையில் அனுமதிக்கப்பட்டிருந்தார். மே 21 ஆம் தேதி பிற்பகல், மாணவிக்கு மூச்சுத் திணறல் அதிகமானதை அடுத்து, அவருக்கு ஆக்சிஜன் உதவி அளிப்பதாகக் கூறி டாக்டர் விஜயகுமார் கிரி என்பவர் அவரைத் தனியாக அறுவை சிகிச்சை அறைக்குள் அழைத்துச் சென்றுள்ளார்.

ஆரம்பத்தில் மாணவியின் மூத்த சகோதரியும் ஒரு செவிலியரும் உடன் சென்ற நிலையில், டாக்டர் கிரி அவர்கள் இருவரையும் அறையை விட்டு வெளியேறுமாறு கட்டாயப்படுத்தியுள்ளார். பின்னர், மாணவியின் கையில் பொருத்தப்பட்டிருந்த நரம்புவழி ஊசி மூலம் மயக்க மருந்தைச் செலுத்தியுள்ளார். இதன் காரணமாக மாணவி சுயநினைவை இழந்துள்ளார். சிறிது நேரம் கழித்துப் பகுதி சுயநினைவு திரும்பிய போது, மருத்துவர் தன்னை பாலியல் வன்கொடுமை செய்ததை உணர்ந்த மாணவி, அழுதுகொண்டே அறுவை சிகிச்சை அறையிலிருந்து வெளியே ஓடிவந்து தனது குடும்பத்தினரிடம் விபரத்தைக் கூறியுள்ளார்.

பாதிக்கப்பட்ட மாணவியின் தந்தை அளித்த புகாரின் பேரில், லக்னோ போலீசார் டாக்டர் விஜயகுமார் கிரி மீது பாலியல் வன்கொடுமை (கற்பழிப்பு) மற்றும் பட்டியல் சாதியினர் மற்றும் பழங்குடியினர் (SC/ST) வன்கொடுமை தடுப்புச் சட்டத்தின் கீழ் முதல் தகவல் அறிக்கை (FIR) பதிவு செய்துள்ளனர். பாதிக்கப்பட்ட மாணவி தனது உடல்நிலை காரணமாகச் சில ஆண்டுகள் பள்ளிக்குச் செல்லாமல் இருந்து, தற்போது மீண்டும் 12-ஆம் வகுப்பு படித்து வருகிறார் என்பது குறிப்பிடத்தக்கது என்று ஏடிசிபி (வடக்கு) ட்விங்கிள் ஜெயின் உறுதிப்படுத்தியுள்ளார்.

இச்சம்பவம் குறித்து அறிந்த உத்தர பிரதேச மாநிலத் துணை முதல்வர் பிரஜேஷ் பதக், உடனடியாக இவ்விவகாரத்தில் தலையிட்டு கடுமையான நடவடிக்கை எடுக்க அதிகாரிகளுக்கு உத்தரவிட்டார். அதன்பேரில், மாநில சுகாதாரத்துறை சம்பந்தப்பட்ட தனியார் மருத்துவமனைக்குச் சீல் வைத்துள்ளதுடன், குற்றம் சாட்டப்பட்ட மருத்துவர் விஜயகுமார் கிரியின் மருத்துவ உரிமத்தை இடைநீக்கம் செய்வதற்கான சட்டப்பூர்வ நடவடிக்கைகளையும் தொடங்கியுள்ளது. “மாநில அரசு பாதிக்கப்பட்ட குடும்பத்திற்கு உறுதுணையாக நிற்கும், குற்றம் சாட்டப்பட்டவருக்குக் கடுமையான தண்டனை உறுதி செய்யப்படும்” என்று துணை முதல்வர் தனது சமூக வலைதள அறிக்கையில் தெரிவித்துள்ளார்.