தமிழகத்தில் ‘இந்தியா’ கூட்டணியின் அஸ்திவாரம் ஆடிக்கொண்டிருக்கும் வேளையில், புதுச்சேரியில் காங்கிரஸிற்குப் பெரும் அதிர்ச்சி கொடுக்க திமுக தலைமை அதிரடியாகக் களம் இறங்கியுள்ளது. தமிழக வெற்றி கழகம் தரப்பிலிருந்து காங்கிரஸிற்கு 70 தொகுதிகள் மற்றும் அமைச்சரவைப் பங்கீடு என்ற கவர்ச்சிகரமான ‘தூண்டில்’ போடப்பட்டுள்ளதாகத் தெரிகிறது. இந்த இழுபறியால் ராகுல் காந்தி முடிவெடுக்கத் தயங்குவது, தி.மு.க தலைமையைப் பெரும் எரிச்சலுக்கு உள்ளாக்கியுள்ளது.
இதன் விளைவாக, புதுச்சேரியில் தனது ஆதிக்கத்தை நிலைநாட்ட தி.மு.க தற்போது ரகசிய சர்வே ஒன்றை நடத்தி வருகிறது. கடந்த தேர்தலை விடக் கூடுதல் தொகுதிகளில் போட்டியிடவும், வெற்றி வாய்ப்புள்ள வேட்பாளர்களைக் கண்டறியவும் இந்த ஆய்வு மேற்கொள்ளப்படுகிறது. புதுச்சேரியில் தி.மு.க தலைமையிலேயே அமைச்சரவை அமைய வேண்டும் என்பதில் பிடிவாதமாக இருக்கும் தலைமை, முதல்வர் அல்லது உள்துறை அமைச்சர் பதவியைத் தன்வசம் வைக்கத் திட்டமிட்டுள்ளது.
கூட்டணிப் பேச்சுவார்த்தையில் தங்களுக்கு 15 இடங்கள் ஒதுக்கப்படாவிட்டால், காங்கிரஸைக் கழட்டிவிடவும் தி.மு.க தயாராகிவிட்டது. இதற்கு முன்னோட்டமாக, காங்கிரஸ் அல்லாத இதர கூட்டணிக் கட்சிகளான சி.பி.எம், சி.பி.ஐ மற்றும் விடுதலைச் சிறுத்தைகள் கட்சி ஆகியவற்றுடன் தி.மு.க ஏற்கனவே ஆலோசனைகளைத் தொடங்கியுள்ளது. “கூட்டணி ஆட்சிக்கு இனி இடமில்லை” என்ற தி.மு.க-வின் மறைமுக அறிவிப்பு காங்கிரஸ் வட்டாரத்தில் கலக்கத்தை ஏற்படுத்தியுள்ளது.
இந்த ரகசிய நகர்வுகள் புதுச்சேரி அரசியலில் ஒரு புதிய அதிகாரப் போட்டியை உருவாக்கியுள்ளன. த.வெ.க-வின் வரவு மற்றும் தி.மு.க-வின் இந்தத் தனித்துவமான நிலைப்பாடு காரணமாக, வரும் தேர்தல்களில் புதுச்சேரி அரசியல் களம் பெரும் மாற்றங்களைச் சந்திக்கும் என எதிர்பார்க்கப்படுகிறது. காங்கிரஸைத் தனிமைப்படுத்திவிட்டு, தனது பலத்தை நிரூபிக்க தி.மு.க எடுத்துள்ள இந்த வியூகம் வெற்றி பெறுமா என்பதைப் பொறுத்திருந்துதான் பார்க்க வேண்டும்.