மறைந்த கேப்டன் விஜயகாந்தின் நிழலில் இருந்து வெளியே வந்து, இன்று தேமுதிகவின் அச்சாணியாக பிரேமலதா விஜயகாந்த் விஸ்வரூபம் எடுத்துள்ளார். தேர்தல் களம் சூடுபிடித்துள்ள நிலையில், தி.மு.க கூட்டணியில் அவர் இணைந்துள்ள விதம் அந்த கூட்டணிக்கு ஒரு புதிய உத்வேகத்தை அளித்துள்ளது. குறிப்பாக, கடந்த சில நாட்களாக சென்னையில் அவர் மேற்கொண்ட சூறாவளிப் பிரச்சாரம் அறிவாலய வட்டாரங்களையே ஆச்சரியத்தில் ஆழ்த்தியுள்ளது. தனது கட்சி வேட்பாளர்களுக்கு மட்டுமின்றி, கூட்டணி தர்மத்தை மதித்து தி.மு.க வேட்பாளர்களுக்காகவும் அவர் காட்டும் அர்ப்பணிப்பு, தொண்டர்களிடையே பெரும் உற்சாகத்தை ஏற்படுத்தியுள்ளது.
தொடக்கத்தில் தேமுதிகவிற்கு 10 சட்டமன்றத் தொகுதிகள் மற்றும் ஒரு மாநிலங்களவை உறுப்பினர் பதவி வழங்கப்பட்டபோது, அது தேமுதிகவின் தற்போதைய பலத்திற்கு “அதிகப்படியான தாராளம்” என்று விமர்சகர்கள் முணுமுணுத்தனர். ஆனால், சென்னை மற்றும் அதன் சுற்றுவட்டாரப் பகுதிகளில் பிரேமலதாவின் அனல் பறக்கும் பிரச்சாரம் அந்த விமர்சனங்களை தவிடு பொடியாக்கியுள்ளது. தான் ஒரு வெறும் அரசியல்வாதி மட்டுமல்ல, ஒரு “மேக்னட்” என்பதைத் தனது உழைப்பின் மூலம் அவர் மெய்ப்பித்து வருகிறார். “சொன்னால் சொன்னபடி செய்வோம்” என்ற கேப்டனின் பாணியிலான அவரது பேச்சு, சாமானிய மக்களை எளிதில் சென்றடைகிறது.
பிரேமலதாவின் பிரச்சாரக் கூட்டங்களில் பெண்களின் வருகை ஒரு ‘சைலண்ட் புரட்சி’யாகப் பார்க்கப்படுகிறது. குடும்பத் தலைவிகளிடம் அவர் உரையாடும் விதம் மற்றும் அவர்களின் அன்றாடப் பிரச்சனைகளைத் தொட்டுப் பேசுவது என பெண்களின் வாக்கு வங்கியை ஈர்க்கும் வித்தையை அவர் லாவகமாகப் பயன்படுத்துகிறார். தி.மு.க-வின் நலத்திட்டங்களையும், தேமுதிகவின் உறுதியையும் இணைத்து அவர் முன்வைக்கும் வாதங்கள் அடிமட்ட அளவில் நல்ல தாக்கத்தை ஏற்படுத்தியுள்ளன. வெறும் மேடைப் பேச்சோடு நின்றுவிடாமல், பூத் கமிட்டி வேலைகள் முதல் வீடு வீடாகச் செல்வது வரை களப்பணிகளிலும் தேமுதிகவினர் காட்டும் தீவிரம் தி.மு.க நிர்வாகிகளையே வியக்க வைத்துள்ளது.
கூட்டணிக் கட்சிகளை ஒருங்கிணைப்பதிலும், மக்களிடம் நம்பிக்கையை விதைப்பதிலும் பிரேமலதா ஒரு துருப்புச் சீட்டாக உருவெடுத்துள்ளார். கேப்டன் இல்லாத இந்த முதல் பெரிய தேர்தல் களத்தை, அவர் மிகவும் துணிச்சலுடனும் பொறுப்புடனும் கையாண்டு வருகிறார். தி.மு.க தலைமை எடுத்த முடிவு ஒரு “மாஸ்டர் ஸ்ட்ரோக்” என்பதைப் பிரேமலதா தனது உழைப்பால் நிரூபித்துக் கொண்டிருக்கிறார். களத்தில் காணப்படும் இந்த அசுர வேகமும், மக்கள் ஆதரவும் தேர்தல் முடிவுகளில் வாக்குகளாக மாறுமா என்பதைப் பொறுத்திருந்துதான் பார்க்க வேண்டும்.