நீதிமன்றத் தீர்ப்புகளும் அரசியல் நகர்வுகளும் எப்போதும் எதிர்பாராத திருப்பங்களைக் கொண்டவை என்பதற்கு கரூர் விவகாரத்தில் திமுகவுக்கு உச்சநீதிமன்றம் மூலம் கிடைத்துள்ள தற்போதைய பின்னடைவே மிகச் சிறந்த உதாரணம். கரூர் கூட்ட நெரிசலில் சிக்கி 41 பேர் உயிரியழந்த சம்பவத்தில், பாதிக்கப்பட்ட குடும்பங்களை நேரில் சந்தித்து அரசுப் பணி நியமன ஆணைகளை வழங்க தற்போதைய முதலமைச்சர் ஜோசப் விஜய் திட்டமிட்டிருந்தார். இதனைத் தடுத்து நிறுத்த திமுக தரப்பு உச்சநீதிமன்றத்தில் அவசர மனு தாக்கல் செய்த நிலையில், “விஜய் மீது குற்றச்சாட்டே இல்லாதபோது, ஒரு முதல்வர் சாட்சிகளை எவ்வாறு கலைக்க முடியும்?” என்று கேள்வி எழுப்பிய நீதிபதிகள், மனுவை வாபஸ் பெறாவிட்டால் தள்ளுபடி செய்வதாக எச்சரித்தனர். இதனால் அவசர அவசரமாக மனுவை வாபஸ் பெற்ற திமுகவுக்கு, இந்த உத்தரவு அரசியல் ரீதியாகப் பெரும் பலத்த அடியாகவும் சரிவாகவும் பார்க்கப்படுகிறது.
இந்தத் தீர்ப்பைத் தொடர்ந்து, கரூர் விவகாரம் நடந்த ஆரம்பக் கட்டத்திலேயே விஜய் மீது திமுக அரசு ஏன் கடுமையான சட்ட நடவடிக்கைகளை எடுக்கவில்லை என்ற கேள்விகளும், முணுமுணுப்புகளும் சமூக வலைத்தளங்களில் மீண்டும் வெடிக்கத் தொடங்கியுள்ளன. அப்போதே விஜய் மீது எப்ஐஆர் பதிவு செய்து கைது செய்திருக்க வேண்டும் என்று திமுகவின் மூத்த தலைவர்களும், முன்னாள் அமைச்சர்களும் தங்களது அதிருப்தியை வெளிப்படுத்தி வருகின்றனர். சம்பவம் நடந்த அன்று, “ஆணையத்தின் மூலம் உண்மை வெளிவரும் போது உரிய நடவடிக்கை எடுக்கப்படும்” என்று அன்றைய முதல்வர் மு.க.ஸ்டாலின் கையாண்ட மென்மையான போக்கும், அதற்கு விஜய்யோ “துணிவிருந்தால் என்னிடம் வந்து பழி வாங்குங்கள்” என்று பகிரங்கமாக விடுத்த சவாலும் தற்போதைய அரசியல் சூழலில் திமுகவினரிடையே பெரும் ஆதங்கத்தை ஏற்படுத்தியுள்ளது.
அரசியல் ரீதியாக விஜய்யைக் கைது செய்தால் அது அவருக்குப் பொதுமக்களிடையே அனுதாப அலையை உருவாக்கிவிடும் என்ற உளவுத்துறையின் ஆலோசனையும், சில அரசியல் கணிப்புகளுமே திமுக தலைமை அன்று அமைதி காக்க முக்கியக் காரணமாகக் கூறப்படுகிறது. ஆனால், உளவுத்துறை மற்றும் சில தனியார் ஏஜென்சிகள் நடத்திய ரகசியக் கருத்துக்கணிப்பில், போலீஸ் பாதுகாப்பு குறைபாடுகள் ஒருபுறமிருந்தாலும் விஜய்யை அரசு நிச்சயம் கைது செய்திருக்க வேண்டும் என்றே பலதரப்பட்ட மக்களும் அழுத்தம் திருத்தமாகத் தெரிவித்திருந்தனர். இந்த மக்கள் தீர்ப்பையும், உளவுத்துறை அறிக்கையையும் மீறி அன்று திமுக தலைமை எடுத்த மெத்தனமான முடிவே, இன்று தும்பை விட்டு வாலை பிடிப்பது போல நீதிமன்றத்தில் அவர்களுக்குப் பின்னடைவாக வந்து முடிந்துள்ளது என்று அக்கட்சியின் தொண்டர்களே இணையத்தில் பொருமி வருகின்றனர்.
இவ்விவகாரம் குறித்து நாம் தமிழர் கட்சியின் மாநில ஒருங்கிணைப்பாளர் இடும்பாவன் கார்த்திக் போன்ற மாற்று அரசியல் தலைவர்கள், “இரண்டு திராவிடக் கட்சிகளும் நீதியை நிலைநாட்ட முயலாமல் தங்களது எதிர்கால அரசியலை மனதில் வைத்தே காய நகர்த்துகின்றன” என்று காட்டமாக விமர்சித்துள்ளனர். நீதிமன்றத் தீர்ப்பு திமுகவுக்கு எதிராக வந்திருந்தாலும், கரூர் பிரச்சாரக் கூட்டத்திற்கு விஜய் தாமதமாக வந்தது, அடிப்படை வசதிகள் செய்யாதது மற்றும் சம்பவத்திற்குப் பின் பாதிக்கப்பட்டோரை உடனே நேரில் சந்திக்காதது போன்ற மக்கள் மத்தியிலுள்ள தீர்க்கப்படாத அடிப்படை அரசியல் சந்தேகங்கள் இன்னும் அப்படியேதான் தொக்கி நிற்கின்றன. எவ்வாறாயினும், வரவிருக்கும் ஜுலை 10 மற்றும் 11 ஆகிய தேதிகளில் முதலமைச்சர் விஜய் கரூருக்கு மேற்கொள்ளவிருக்கும் பயணம் தற்போதைய தமிழக அரசியல் களத்தை மேலும் சூடாக்கியுள்ளது என்பதில் சந்தேகமில்லை.