மாப்பிள்ளைக்கு காக்கா… “வைரமுத்தால் திமுகவுக்கு கால் பைசா பிரயோஜனம் இல்ல”… கொதித்தெழுந்த திமுக ஆதரவாளர்… ஸ்டாலினுக்கு விழுந்த பகிரங்க எச்சரிக்கை…!

நடந்து முடிந்த தமிழக சட்டமன்றத் தேர்தலில், திமுக எளிதாக வெற்றி பெறும் என்று அக்கட்சியினரும் அரசியல் கணிப்பாளர்களும் உறுதியாக நம்பினர். விஜய்யின் தமிழக வெற்றிக் கழகம் (தவெக) பிரிக்கும் வாக்குகள் அதிமுகவைப் பலவீனப்படுத்தும் என்றும், அது தங்களுக்குச் சாதகமாக அமையும் என்றும் திமுக கணக்கு போட்டது. ஆனால், அனைத்துக் கணிப்புகளையும் தவிடுபொடியாக்கி, 108 இடங்களில் வென்று தனிப்பெரும் கட்சியாக உருவெடுத்த தவெக, திமுகவின் கூட்டணிக் கட்சிகளின் ஆதரவோடு ஆட்சியையும் அமைத்துவிட்டது. இந்த எதிர்பாராத அதிர்ச்சித் தோல்விக்கான காரணங்களை திமுக தலைமை ஆராய்ந்து வரும் வேளையில், அக்கட்சியின் தீவிர ஆதரவாளர் ஒருவர் ‘எக்ஸ்’ (ட்விட்டர்) தளத்தில் வெளியிட்டுள்ள விமர்சனம் தற்பொழுது அரசியல் வட்டாரத்தில் பெரும் விவாதத்தைக் கிளப்பியுள்ளது.

அக்கட்சியின் கீழ்மட்டத் தொண்டர்கள் திமுக மீதான குற்றச்சாட்டுகளுக்குப் பொதுவெளியில் விளக்கம் அளிக்க முயன்றபோது, கட்சியின் மேல்மட்டமே அவர்களின் வாயை மூடியதுதான் இந்தத் தோல்விக்கான முதற்புள்ளி என்று அந்த ஆதரவாளர் சுட்டிக்காட்டியுள்ளார். கலைஞர், ஸ்டாலின், உதயநிதி என அடுத்தடுத்த தலைமுறைகள் வந்ததை ஓரளவுக்கு அரசியல் புரிதல் உள்ளவர்களால் ஏற்றுக்கொள்ள முடிந்தது. ஏனெனில், அவர்கள் மக்களால் தேர்ந்தெடுக்கப்பட்டு, கொள்கை வழியில் நின்றார்கள். ஆனால், அதிகாரப்பூர்வ கட்சிக் கட்டமைப்பையும் தாண்டி, ‘கிச்சன் கேபினட்’ எனப்படும் நிழல் அதிகார மையங்கள் கட்சியை ஆக்கிரமித்ததே பொதுமக்களிடையே பெரும் அதிருப்தியை ஏற்படுத்தியுள்ளது என அவர் வேதனை தெரிவித்துள்ளார்.

குறிப்பாக, முக ஸ்டாலினின் மருமகன் சபரீசன் கட்சியில் எந்த அதிகாரப்பூர்வ பதவியிலும் இல்லாதபோது, அவரைச் சுற்றியே ஒட்டுமொத்த அதிகாரமும் சுழல்வதை அவர் கடுமையாகச் சாடியுள்ளார். திமுகவின் முக்கியப் பொறுப்பாளர்கள் தங்களின் செல்வாக்கை வளர்த்துக்கொள்ள சபரீசனைச் சந்திப்பதோடு நிறுத்தாமல், பொதுவெளியில் “மரியாதைக்குரிய மாப்பிள்ளை அவர்களைச் சந்தித்தேன்” என்று பதிவிடுவதைச் சுட்டிக்காட்டியுள்ளார். இது போன்ற செயல்கள் சுயநலத்திற்கானது என்றும், இது ‘குடும்ப ஆட்சி’ என்ற எதிர்க்கட்சிகளின் விமர்சனத்தை உண்மையாக்கி, பொதுவான வாக்காளர்களை திமுகவை விட்டு வெகுவாக விலக்கியுள்ளது என்றும் அவர் குறிப்பிட்டுள்ளார். மேலும், தேர்தல் நேரத்தில் வில்லிவாக்கத்தில் சபரீசன் நேரடியாகப் பிரச்சாரத்தில் ஈடுபட்டு முகம் காட்டியது, பொது மக்களிடையே கடுமையான எரிச்சலை ஏற்படுத்தி வாக்குகளைக் குறைத்தது என்று அவர் உறுதியாக நம்புகிறார்.

இதன் தொடர்ச்சியாக, அண்மையில் ஸ்டாலினைச் சந்தித்த கவிஞர் வைரமுத்து, “மாப்பிள்ளையோடு சந்தித்தேன்” எனப் பதிவிட்டிருப்பதை அவர் கடுமையாகச் சாடியுள்ளார். வைரமுத்து போன்றவர்கள் திமுகவையும், சபரீசனையும் ‘காக்காய் பிடிப்பதால்’ அவர்களுக்குப் பிரயோஜனம் இருக்கலாம்; ஆனால், வைரமுத்தால் திமுகவுக்குக் கால் பைசா கூட பிரயோஜனம் இல்லை, மாறாகப் பெரும் நட்டமே தவிர வேறொன்றுமில்லை என்று பதிவிட்டுள்ளார். “மாப்பிள்ளைக்கு நான் நெருக்கமானவன்” என்று காட்டிக்கொள்ளத் துடிக்கும் இவர்களால் கட்சிக்கு அழிவுதான் என்பதை திமுக தலைவர் முக ஸ்டாலின் இனியாவது புரிந்துகொள்ள வேண்டும் என்பதே அடிமட்ட திமுக தொண்டர்களின் ஒட்டுமொத்தக் குரலாக இந்தத் தோல்விக்குப் பின் எதிரொலிக்கிறது.