ஒரே நாளில் மாறிய திமுகவின் பொலிட்டிக்கல் மேப்… அன்பில் மகேஷ், சேகர்பாபுவுக்கு ஸ்டாலின் வைத்த ஆப்பு…. மிரண்டுபோன சீனியர்கள்…!

திமுகவின் உட்கட்சி நிர்வாகத்தைச் சீரமைக்கவும், வரும் சட்டமன்றத் தேர்தலை எதிர்கொள்ளும் வகையில் செயல்பாடுகளைத் தீவிரப்படுத்தவும் வசதியாக, கழக உட்கட்சி மாவட்டங்களின் எண்ணிக்கை 110-ஆக உயர்த்தப்பட்டுள்ளதாக திமுக தலைவர் மு.க.ஸ்டாலின் அதிகாரப்பூர்வமாக அறிவித்துள்ளார். இந்த மறுசீரமைப்பின் கீழ், தலைநகர் சென்னையில் இதுவரை இருந்த 6 உட்கட்சி மாவட்டங்கள் தற்போது 10-ஆக அதிகரிக்கப்பட்டுள்ளன. மேலும், கன்னியாகுமரி மாவட்டம் 3 உட்கட்சி மாவட்டங்களாகவும், நெல்லை மற்றும் தென்காசி மாவட்டங்கள் தலா 2 உட்கட்சி மாவட்டங்களாகவும் பிரிக்கப்பட்டு புதிய நிர்வாக அமைப்புகள் உருவாக்கப்பட்டுள்ளன.

இப்புதிய கட்டமைப்பு மாற்றத்தில் முக்கிய நிர்வாகிகளின் பொறுப்புப் பங்கீடுகளிலும் பல்வேறு அதிரடி மாற்றங்கள் செய்யப்பட்டுள்ளன. முன்னாள் அமைச்சர் மா.சுப்பிரமணியனுக்கு வேளச்சேரி, மயிலாப்பூர், சைதாப்பேட்டை ஆகிய 3 தொகுதிகள் ஒதுக்கப்பட்ட நிலையில், முன்னாள் அமைச்சர் சேகர்பாபுவுக்கு துறைமுகம், திரு.வி.க. நகர் (தனி), வில்லிவாக்கம் ஆகிய 3 தொகுதிகள் பிரித்துக் கொடுக்கப்பட்டுள்ளன. அதேவேளையில், முன்னாள் அமைச்சர் அன்பில் மகேஷின் கட்டுப்பாட்டில் இருந்த சட்டமன்றத் தொகுதிகளின் எண்ணிக்கை மூன்றிலிருந்து இரண்டாகக் குறைக்கப்பட்டுள்ளது. அவருக்குத் தற்போது திருவெறும்பூர் மற்றும் மணப்பாறை ஆகிய இரு தொகுதிகள் மட்டுமே வழங்கப்பட்டுள்ளதன் மூலம், உட்கட்சி அதிகார அமைப்பில் கணிசமான மாற்றங்கள் அரங்கேறியுள்ளன.