நடந்து முடிந்த தமிழ்நாடு சட்டமன்றத் தேர்தலில் திமுக சந்தித்த தோல்விக்கான உண்மையான காரணங்களை ஆராய அக்கட்சியால் அமைக்கப்பட்ட 19 இரு நபர் குழுக்கள், தங்களது விரிவான அறிக்கையை முன்னாள் முதலமைச்சர் மு.க.ஸ்டாலினிடம் சமர்ப்பித்துள்ளன. கடந்த மே 16 அன்று உருவாக்கப்பட்ட இந்தக் குழுக்கள், மாநிலத்தின் அனைத்துப் பகுதிகளுக்கும் நேரில் சென்று அடிமட்டத் தொண்டர்கள், பொதுமக்கள் மற்றும் உள்ளூர் பிரமுகர்களிடம் சேகரித்த நேரடி கருத்துகளின் அடிப்படையில் இந்த அறிக்கையைத் தயாரித்துள்ளன. “விஜய்யின் வளர்ச்சியை நாம் கண்டிக்கவில்லை; ஆனால் கட்சிக்கு உள்ளேயே பலர் முதுகில் குத்திவிட்டனர். கட்சி அமைப்பை விட அரசு நிர்வாகத்திற்கு அதிக முக்கியத்துவம் கொடுத்ததே இந்த பின்னடைவுக்குக் காரணம்” என்ற தொண்டர்களின் ஆதங்கமே இந்த அறிக்கையின் மையப்புள்ளியாக அமைந்துள்ளது.
தமிழக வெற்றிக் கழகம் (தவெக) மற்றும் நடிகர் விஜய்யின் அரசியல் எழுச்சியை திமுக தலைமை தவறாக மதிப்பீடு செய்ததே தோல்வியின் முக்கிய காரணியாக அறிக்கை சுட்டிக்காட்டுகிறது. நகர்ப்புறங்களில் இளைஞர்கள் மற்றும் பெண்கள் மத்தியில் தவெகவுக்கு இருந்த தீவிர ஆதரவை திமுக தலைமை சரியாக உணரவில்லை. விஜய்யின் செல்வாக்கு குறித்து அடிமட்டத் தொண்டர்கள் பல மாதங்களாக மாவட்டச் செயலாளர்களுக்கும் மூத்த தலைவர்களுக்கும் எச்சரிக்கை விடுத்தும், அவை “சாதாரணம்” என அலட்சியமாகப் புறக்கணிக்கப்பட்டன. மேலும், தவெகவின் அதிவேக சமூக ஊடகப் பிரச்சாரத்திற்கு ஈடுகொடுக்க முடியாமல் திமுகவின் டிஜிட்டல் பிரச்சாரம் பலவீனமாக இருந்ததும் இந்தத் தோல்வியைத் தீவிரப்படுத்தியுள்ளது.
அரசின் சாதனையாகக் கருதப்பட்ட ‘கலைஞர் மகளிர் உரிமைத் திட்டம்’ கூட எதிர்பாராத விபரீதத்தை ஏற்படுத்தியுள்ளது. இத்திட்டத்தின் மூலம் லட்சக்கணக்கான பெண்கள் பயனடைந்தாலும், தகுதியிருந்தும் விடுபட்ட பெண்களின் கோபம் திமுகவுக்கு எதிராகத் திரும்பியது. அதைவிட அதிர்ச்சியாக, இத்திட்டத்தின் கீழ் பயன்பெற்ற பெண்களில் 40 சதவீதத்தினர் கூட திமுகவுக்கு வாக்களிக்கவில்லை என்ற தகவல் அறிக்கையில் வெளிவந்துள்ளது. அரசு நிர்வாகத்தை அதிகாரிகள் மூலம் மட்டுமே கொண்டு செல்ல முயன்றதால், மக்கள் நலத் திட்டங்கள் அனைத்தும் ‘அரசின் திட்டங்களாகவே’ பார்க்கப்பட்டன. உள்ளூர் திமுக பொறுப்பாளர்களின் பரிந்துரைகளை அதிகாரிகள் நிராகரித்ததால், மக்களுக்கும் கட்சிக்கும் இடையிலான நேரடித் தொடர்பு முற்றிலும் அறுந்து போனது.
தேர்தல் உத்திகளை வகுக்க தொண்டர்களை நம்பாமல், உள்நாட்டு மற்றும் வெளிநாட்டு கார்ப்பரேட் ஏஜென்சிகளை அதிகம் நம்பியதும் அடிமட்டத்தில் கடும் அதிருப்தியை ஏற்படுத்தியுள்ளது. இதோடு, மு.க.ஸ்டாலினுக்கு நெருக்கமான சிலரின் அசுர வளர்ச்சியும், கட்சி உள்விவகாரங்களில் அவர்களின் நேரடித் தலையீடும் உட்கட்சி பூசல்களை பன்மடங்கு அதிகரித்துள்ளன. ஒட்டுமொத்தமாக, அரசு நிர்வாகத்தில் காட்டிய கவனத்தைக் கட்சியின் உயிர்நாடியான தொண்டர்கள் மீதும், புதிய அரசியல் மாற்றங்கள் மீதும் காட்டத் தவறியதே திமுகவின் இந்த வீழ்ச்சிக்குக் காரணம் என இந்த அறிக்கை தெளிவாகக் கூறுவதால், இது திமுகவில் பெரும் உள்கட்சி விவாதங்களுக்கும் மாற்றங்களுக்கும் வழிவகுக்கும் என எதிர்பார்க்கப்படுகிறது.