தமிழக அரசியலில் கூட்டணி மற்றும் சித்தாந்தக் கணக்குகளைத் தாண்டி, தலைவர்களின் மேடைப் பேச்சுகளும் தனிப்பட்ட விமர்சனங்களும் மக்கள் மத்தியில் எப்போதும் பெரும் விவாதத்தைக் கிளப்புவது வழக்கம். அந்த வகையில், மதுராந்தகப் பிரச்சாரத்தின் போது தவெக தலைவரும் தற்போதைய முதல்வருமான விஜய், முன்னாள் முதல்வர் மு.க.ஸ்டாலினை “ஸ்வீட் அங்கிள்” என்று விமர்சித்திருந்தார். இதற்குப் பதிலடி கொடுக்கும் வகையில் பேசிய திமுக எம்பி கனிமொழி, “விஜய் என் அண்ணனை அங்கிள் என்று அழைப்பதால், அவர் எனக்குச் சொந்தக்காரர் ஆகிவிட்டார். எனவே, அவரை நான் அன்பு தம்பி என்று அழைப்பதில் எந்தத் தவறும் இல்லைதானே?” எனச் சாடி அரசியல் களத்தைச் சூடேற்றியுள்ளார்.
திரைப்பட பாணியில் ஒரே நாளில் ஆட்சியில் பெரிய மாற்றத்தைக் கொண்டுவருவோம் என்று வாக்குறுதி அளித்து ஆட்சிக்கு வந்தவர்கள், தற்போது மக்களை ஏமாற்றத்தில் தள்ளியிருப்பதாகக் கனிமொழி குற்றம் சாட்டினார். ஆட்சிப் பொறுப்பேற்று நான்கு மாதங்கள் மட்டுமே ஆகியுள்ள நிலையில், வாக்களித்த மக்கள் எவ்வித நேர்மறையான மாற்றத்தையும் உணரவில்லை என்றும், முந்தைய திமுக ஆட்சியில் இருந்த அமைதியும் வளர்ச்சியும் தற்போது முற்றிலும் சீர்குலைந்து போய்விட்டதாகவும் அவர் தனது உரையில் சுட்டிக்காட்டினார்.
மாநிலத்தின் தற்போதைய சட்டம் ஒழுங்கு சீர்கேடுகள் குறித்து மிகக் கடுமையான விமர்சனங்களை முன்வைத்த அவர், வீடுகளில் அன்றாடம் ஏற்படும் தொடர் மின்வெட்டு மற்றும் அதிகரித்து வரும் குற்றச் சம்பவங்களைக் குறிப்பிட்டுக் கண்டனம் தெரிவித்தார். “மின்வெட்டு காரணத்தால் புழுக்கம் தாங்க முடியாமல் பெண்கள் இரவில் வீட்டை விட்டு வெளியே வர நினைத்தால், சட்டம் ஒழுங்கு சீர்கேடால் வெளியே வரக்கூட பயப்படும் சூழலே நிலவுகிறது” என்று கூறிய அவர், மின்வெட்டுக்கும் அரிவாள் வெட்டுக்கும் இடையேதான் தற்போதைய ஆட்சியில் போட்டியே நடப்பதாக விமர்சித்தார்.
மேலும், முதல்வர் விஜய்யின் நேரடித் கட்டுப்பாட்டில் உள்ள காவல்துறையின் செயல்பாடுகளைப் புள்ளிவிவரங்களுடன் சுட்டிக்காட்டி அவர் சாடினார். ஆட்சிக்கு வந்த இந்த குறுகிய நான்கு மாத காலத்தில் 550-க்கும் மேற்பட்ட குற்றச் சம்பவங்கள், 200-க்கும் அதிகமான கொலைகள், 300-க்கும் மேற்பட்ட பெண்கள் மற்றும் குழந்தைகளுக்கு எதிரான பாலியல் குற்றங்கள், 8 காவல் மரணங்கள் மற்றும் 10-க்கும் மேற்பட்ட ஆணவக் கொலைகள் நடந்துள்ளதாகக் குற்றம் சாட்டிய அவர், “மாற்றம் மாற்றம் என்று கூறி ஆட்சிக்கு வந்தவர்கள் மக்களுக்கு ஏமாற்றத்தையே பரிசாக அளித்துள்ளனர்” எனக் கூறித் தனது உரையை நிறைவு செய்தார்.