மதுரை மேற்கு சட்டமன்றத் தொகுதியில் தற்போதைய வணிகவரித்துறை அமைச்சர் பி.மூர்த்தி மேற்கொண்டு வரும் தீவிரப் பணிகள், அதிமுகவின் மூத்த தலைவரான செல்லூர் ராஜுவுக்குப் பெரும் சவாலாக மாறியுள்ளன. அமைச்சர் மூர்த்தி அந்தத் தொகுதியில் பல்வேறு நலத்திட்ட உதவிகள், மருத்துவ முகாம்கள் மற்றும் பரிசுப் பொருட்களை வழங்கி மக்கள் மத்தியில் பலமாகத் தடம் பதித்து வருகிறார். அமைச்சரின் இந்த அதிரடித் தேர்தல் வியூகத்தால், வரும் தேர்தலில் மேற்குத் தொகுதியில் வெற்றி பெறுவது கடினம் என்பதை உணர்ந்து கொண்ட செல்லூர் ராஜு, தற்போது தனது கவனத்தை மதுரை தெற்குத் தொகுதிக்கு மாற்றியுள்ளார்.
செய்தியாளர்களின் கேள்விகளுக்குப் பதிலளித்த செல்லூர் ராஜு, மதுரை மேற்குத் தொகுதி எப்போதும் அதிமுகவின் எஃகு கோட்டை என்றும், அங்கு யார் நின்றாலும் வெற்றி பெறுவார்கள் என்றும் மேலோட்டமாகக் கூறிவிட்டு, மதுரை தெற்குத் தொகுதியில் தனது தேர்தல் பணிகளைத் தொடங்கிவிட்டார். பல ஆண்டுகளாகத் தான் வென்று வந்த தொகுதியைத் தவிர்த்துவிட்டு, அவர் தெற்கு நோக்கி நகர்ந்திருப்பது அரசியல் வட்டாரத்தில் பெரும் விவாதத்தை ஏற்படுத்தியுள்ளது. திமுக அமைச்சரின் ஆதிக்கத்திற்கு ஈடுகொடுக்க முடியாமல் அவர் பின்வாங்குவதாக அரசியல் விமர்சகர்கள் கருதுகின்றனர்.
செல்லூர் ராஜுவின் இந்தத் திடீர் முடிவு, அதிமுகவின் கூட்டணிக் கட்சியான பாஜகவுக்குப் பெரும் நெருக்கடியை ஏற்படுத்தியுள்ளது. மதுரை தெற்குத் தொகுதியைத் தங்கள் இலக்காகக் கொண்டு, பாஜகவின் மூத்த நிர்வாகி மகாலட்சுமி நீண்ட நாட்களாகத் தேர்தல் பணிகளில் ஈடுபட்டு வருகிறார். “மதுரை தெற்கு: நமது இலக்கு” என்ற முழக்கத்துடன் அண்ணாமலையின் புகைப்படத்தைத் தாங்கி சமூக வலைதளங்களில் அவர் தீவிரப் பிரச்சாரம் செய்து வரும் நிலையில், செல்லூர் ராஜுவும் அதே தொகுதியைக் குறிவைப்பது கூட்டணிக் கட்சிகளுக்கு இடையே சலசலப்பை ஏற்படுத்தியுள்ளது.
தொகுதிப் பங்கீட்டின் போது மதுரை தெற்குத் தொகுதியை யாருக்கு ஒதுக்குவது என்பதில் அதிமுக மற்றும் பாஜக இடையே தற்போது சிக்கல் ஏற்பட்டுள்ளது. ஏற்கனவே இரு கட்சிகளுக்கும் இடையே பல்வேறு கருத்து வேறுபாடுகள் நிலவி வரும் நிலையில், செல்லூர் ராஜுவின் இந்த நகர்வு தொகுதிப் பங்கீட்டுப் பேச்சுவார்த்தையில் பெரும் இழுபறியை ஏற்படுத்தும் எனத் தெரிகிறது. மதுரை அரசியலில் ஏற்பட்டுள்ள இந்த மும்முனைப் போட்டி, தேர்தல் நெருங்கும் வேளையில் இன்னும் சூடுபிடிக்கும் என எதிர்பார்க்கப்படுகிறது.