2026 சட்டமன்றத் தேர்தல் முடிவுகள் ஆளுங்கட்சியான திமுகவிற்குப் பெரும் அதிர்ச்சியை ஏற்படுத்தியுள்ளன. இந்தத் தோல்விக்கு முதன்மையான காரணமாகப் பார்க்கப்படுவது, பலமானதாகக் கருதப்பட்ட திமுக கூட்டணியின் அடிமட்டத் தொண்டர்களுக்கு இடையே ஏற்பட்ட பிணைப்புச் சிதைவுதான். தேர்தலுக்கு முன்பே தொகுதிப் பங்கீடு மற்றும் அதிகாரப் பகிர்வு தொடர்பாக எழுந்த மோதல்கள், கூட்டணித் தலைவர்களால் சுமுகமாக முடிக்கப்பட்டாலும், அது தொண்டர்கள் மத்தியில் பெரும் கசப்புணர்வையே விதைத்தது. குறிப்பாக, காங்கிரஸ் கட்சி ஆட்சியில் பங்கு மற்றும் அமைச்சரவை பதவியைக் கோரிப் போர்க்கொடி தூக்கியது, அதுவரை அமைதியாக இருந்த கூட்டணியில் முதல் சலசலப்பை உருவாக்கியது.
கூட்டணியில் ஏற்பட்ட அடுத்தகட்ட விரிசலுக்குத் தேமுதிகவின் வருகை முக்கிய காரணமாக அமைந்தது. புதிய வரவுகளால் தங்களுக்கு ஒதுக்கப்படும் இடங்கள் குறையும் என்ற அச்சம் நிலவிய சூழலில், திமுக தலைமை பிடிவாதமாக இடங்களைக் குறைத்தது மற்ற கட்சிகளை அதிருப்தி அடையச் செய்தது. 40 தொகுதிகளைக் கேட்ட காங்கிரஸ், இரட்டை இலக்கத் தொகுதிகளை எதிர்பார்த்த விடுதலைச் சிறுத்தைகள் மற்றும் கூடுதல் இடங்களை வலியுறுத்திய இடதுசாரிகள் என அனைவரும் திமுகவின் கடும்பிரேச்சுகளுக்குப் பணிந்து குறைந்த இடங்களை ஏற்க வேண்டிய கட்டாயத்திற்குத் தள்ளப்பட்டனர். இது அந்தந்த கட்சித் தொண்டர்களிடையே தங்களை திமுக குறைத்து மதிப்பிடுவதாக எண்ணத் தூண்டியது.
இந்த அதிருப்தி சமூக வலைத்தளங்களில் வெளிப்படையான விமர்சனங்களாக வெடித்தன. குறிப்பாக, விசிக மற்றும் காங்கிரஸ் தொண்டர்கள் திமுகவின் மேலாதிக்கப் போக்கைச் சாடினர். இதன் விளைவாக, தேர்தல் களத்தில் ஒரு வினோதமான சூழல் நிலவியது. விசிகவினர் தாங்கள் போட்டியிடும் இடங்களில் மட்டும் கவனம் செலுத்துவது என்றும், மற்ற இடங்களில் மாற்றுச் சக்திகளுக்கு மறைமுக ஆதரவு அளிப்பது என்றும் எடுத்த ரகசிய முடிவுகள் திமுகவின் வெற்றி வாய்ப்பைப் பெருமளவு பாதித்தன. தங்களுக்கு உரிய அங்கீகாரம் கிடைக்காத வேதனையில், கூட்டணி தர்மத்தை மீறிச் செயல்படும் மனநிலைக்குத் தொண்டர்கள் தள்ளப்பட்டனர்.
தேர்தலுக்குப் பிந்தைய சூழலில், விடுதலைச் சிறுத்தைகள் கட்சித் தலைவர் திருமாவளவனே தனது கட்சித் தொண்டர்கள் கூட்டணி வேட்பாளர்களுக்குச் சரியாக வேலை செய்யவில்லை என்று பகிரங்கமாக ஒப்புக்கொண்டது நிலைமையின் தீவிரத்தைப் பறைசாற்றுகிறது. அதேபோல், காங்கிரஸாரும் திமுகவிற்குப் பாடம் புகட்ட வேண்டும் என்ற முனைப்பில் செயல்பட்டது வாக்குப் பதிவில் எதிரொலித்தது. தலைவர்களின் மேடைப் பேச்சுகளுக்கு அப்பால், களத்தில் தொண்டர்களுக்கிடையே ஏற்பட்ட இந்தத் தொடர்பற்ற தன்மையும், ஒருங்கிணைப்பு இல்லாமையுமே திமுகவின் தோல்விக்கு அச்சாரமாக அமைந்துவிட்டது.