நடைபெற்று முடிந்த தமிழ்நாடு சட்டமன்றத் தேர்தலில், விஜய் தலைமையிலான தமிழக வெற்றிக் கழகத்திடம் திராவிட முன்னேற்றக் கழகம் எதிர்பாராத மிகப்பெரிய தோல்வியைத் தழுவியது. மீண்டும் ஆட்சியைப் பிடிப்போம் என்ற அதீத நம்பிக்கையுடன் இருந்த அக்கட்சிக்கு இந்தத் தேர்தல் முடிவு மாபெரும் அதிர்ச்சியைக் கொடுத்தது. ஒட்டுமொத்த கட்சியின் தோல்வியை விட, கொளத்தூர் தொகுதியில் திமுக தலைவர் மு.க.ஸ்டாலின் சந்தித்த தோல்வி அக்கட்சியின் தொண்டர்களுக்கும் நிர்வாகிகளுக்கும் ஈடுசெய்ய முடியாத பெருத்த வேதனையை ஏற்படுத்தியுள்ளது.
தேர்தல் முடிவுகளின் விரக்தியால், திமுகவின் மூத்த நிர்வாகிகளும் ஆதரவாளர்களும் வாக்களித்த பொதுமக்களைத் தொடர்ந்து தரக்குறைவாக விமர்சித்து வருவது பெரும் சர்ச்சையை விசிறிவிட்டுள்ளது. சைதாப்பேட்டை தொகுதியில் மா.சுப்பிரமணியன் தோற்றதற்காக, அத்தொகுதி மக்களைக் கடுமையாகச் சபித்து திமுக அமைப்புச் செயலாளர் ஆர்.எஸ்.பாரதி சமீபத்தில் பேசியுள்ளார். இதேபோன்று முன்னாள் அமைச்சர் அனிதா ராதாகிருஷ்ணன், நடிகர் சத்யராஜ் உள்ளிட்டோரும் கொளத்தூர் வாக்காளர்களைக் கேவலப்படுத்தும் தொனியில் விமர்சித்துள்ளனர். இணையதளங்களிலும் திமுக ஆதரவாளர்கள், மின்வெட்டு போன்ற அன்றாடப் பிரச்சனைகளைச் சுட்டிக்காட்டி ‘தவெக-விற்கு வாக்களித்ததற்கு அனுபவியுங்கள்’ என வன்மத்துடன் பதிவிட்டு வருகின்றனர்.
ஜனநாயகத்தில் வெற்றியைப் போலவே மக்கள் அளிக்கும் தோல்வியையும் மனப்பூர்வமாக ஏற்றுக்கொள்ள வேண்டும் எனப் பலரும் திமுகவினருக்கு அறிவுறுத்தி வருகின்றனர். கட்சியின் தலைவர் மு.க.ஸ்டாலின் தேர்தல் முடிவை ஏற்பதாக அறிவித்த பின்னரும், அவரது கட்சியினர் தொடர்ந்து மக்களை அவமதித்து வருவது பொதுமக்களிடையே மேலும் அதிருப்தியையே சம்பாதித்துத் தரும் என அரசியல் நோக்கர்கள் எச்சரிக்கின்றனர். எனவே, வாக்காளர்களைக் கீழ்த்தரமாக விமர்சிக்கும் மூத்த தலைவர்கள் மற்றும் ஆதரவாளர்களின் பேச்சுகளுக்கு முற்றுப்புள்ளி வைக்கும் வகையில், அவர்கள் மீது மு.க.ஸ்டாலின் உடனடியாகக் கடுமையான நடவடிக்கை எடுக்க வேண்டும் என்ற கோரிக்கை சமூகத்தின் பல்வேறு தரப்பிலிருந்தும் வலுவாக எழுந்துள்ளது.