தமிழக சட்டமன்றக் கூட்டத்தொடரில், முதலமைச்சர் விஜய் திமுக தலைவர் மு.க.ஸ்டாலின் மிசா சட்டத்தின் கீழ் கைது செய்யப்பட்டது தொடர்பான நிகழ்வுகளை விமர்சிக்கும் வகையில் சில செய்கைகளைச் செய்திருந்தார். இந்தச் சம்பவம் பெரும் அரசியல் புயலைக் கிளப்பியதைத் தொடர்ந்து, மிசா காலத்தில் தான் எதிர்கொண்ட அனுபவங்கள் மற்றும் சிறைக்கொடுமைகள் குறித்து விளக்கி முதல்வர் ஸ்டாலின் அதிகாரப்பூர்வ வீடியோ ஒன்றை வெளியிட்டார். ஆனால், இந்த வீடியோவை தமிழக வெற்றி கழகத்தின் ஐடி விங் சமூக வலைதளங்களில் கிண்டல் செய்து அறிக்கை வெளியிட்டது, இரு தரப்பிற்கும் இடையிலான மோதலை மேலும் தீவிரப்படுத்தியது.
தவெக-வின் இந்த விமர்சனத்திற்கு மிகக் கடுமையான மொழியில் பதிலடி கொடுத்துள்ள திமுக ஐடி விங், சமூக வலைதளங்களில் காரசாரமான அறிக்கை ஒன்றை வெளியிட்டுள்ளது. “எச்சில் பழம் பொறுக்கும் அணில்கள் கண்ணை மூடிக்கொண்டால், உழைப்பாலும் தியாகத்தாலும் கட்டமைக்கப்பட்ட திமுகவின் வரலாறு இருண்டு போய்விடாது” என்று தன் பதிவைத் தொடங்கியுள்ள திமுக ஐடி விங், ஊர் முழுவதும் பொய்யைப் பரப்பும் கூட்டத்தை அம்பலப்படுத்தவே தங்கள் தலைவர் நாகரிகத்தோடு விளக்கம் அளித்ததாகக் குறிப்பிட்டுள்ளது. மேலும், இந்த விளக்கம் வரலாற்றுத் தெளிவு இல்லாத தற்குறிகளுக்கானது அல்ல என்றும், பொய்களை நம்பி மக்கள் ஏமாறக்கூடாது என்பதற்காகவே வெளியிடப்பட்டது என்றும் விளக்கமளித்துள்ளது.
தவெக தலைவர் விஜய்யின் திரைத்துறைப் பின்னணியையும் அரசியல் அனுபவமின்மையையும் நேரடியாகச் சுட்டிக்காட்டி திமுக கடுமையான தாக்குதலைத் தொடுத்துள்ளது. “தந்தையின் தயவால் சினிமாவில் வளர்ந்து, ஏசி கேரவனுக்குள் பவுடர் பூசி, டூப் வைத்துச் சண்டை போட்ட ஒருவருக்கு, சிறைக் கொட்டடியில் MISA கைதிகள் பூட்ஸ் காலால் மிதிபட்டுச் சிந்திய ரத்தத்தின் மதிப்பு எப்படித் தெரியும்?” என்று கேள்வி எழுப்பியுள்ளது. சினிமா வசனங்களையும் ஐடி ரெய்டு நகல்களையும் மட்டுமே பார்த்துப் பழகியவர்களுக்கு, எமர்ஜென்சி கொடுமைகளை ஆவணப்படுத்திய ‘இஸ்மாயில் கமிஷன் அறிக்கை’ போன்ற வரலாற்று ஆவணங்களைப் புரிந்து கொள்ளும் சக்தி இல்லை என்றும் அடுக்கடுக்கான குற்றச்சாட்டுகளை முன்வைத்துள்ளது.
பத்திரிகையாளர்களைச் சந்திக்கத் துப்பில்லாமல், சட்டமன்ற பதிலுரைக்காக நாட்கணக்கில் மனப்பாடம் செய்து கேமரா முன்னால் நடிக்கும் ஒருவருக்கு நிஜ வலிகளின் உணர்வு புரியாது என்று விமர்சித்துள்ள திமுக, மிசா தியாகம் என்பது பஞ்சு மெத்தையில் உருளுவது அல்ல என்றும், அது இரும்புக் கம்பிகளுக்கு இடையே ரத்தம் சிந்திய நிஜம் என்றும் சுட்டிக்காட்டியுள்ளது. மேலும், முத்தமிழறிஞர் கலைஞரின் ‘மஞ்சள் துண்டு’ சமூகநீதியைக் காத்த சுயமரியாதைக் குறியீடு என்றும், தவெக தலைவரின் மேக்கப்பைக் கலைத்துவிட்டால் உள்ளே இருப்பது வெற்று அரசியல் சூனியமும் நிர்வாகத் திறமையின்மையும்தான் என்றும் சாடியுள்ளது.
கொள்கையோ சித்தாந்தமோ இல்லாமல், தியாகிகளைக் கொச்சைப்படுத்தி அரசியல் செய்ய நினைக்கும் அநாகரிகச் சாக்கடையிலேயே ‘தவெக’ எனும் காகிதக் கப்பல் மூழ்கிப்போகும் என திமுக எச்சரித்துள்ளது. மிசா சிறைவாசம் தொடர்பான வரலாற்று ஆதாரங்களை இணைத்துப் பகிர்ந்துள்ள திமுக ஐடி விங், வரலாற்றில் நிலைத்து நிற்கும் தியாகத்தை உருவக் கேலி செய்த அற்பத்தனத்தை தமிழக மக்கள் ஒருபோதும் ஏற்க மாட்டார்கள் என்று கூறி தன் அறிக்கையை நிறைவு செய்துள்ளது. இந்தத் தாக்குதல் அறிக்கை தற்போது தமிழக அரசியல் களத்தில் பெரும் பரபரப்பை ஏற்படுத்தியுள்ளது.