திமுகவும் அதிமுகவும் இணைவது என்பது சாத்தியமே இல்லாத ஒன்று என்றும், அது தவெக அரசு கிளப்பிவிடும் பொய்யான வதந்தி என்றும் திமுக முன்னாள் அமைச்சர் ரகுபதி புதுக்கோட்டையில் செய்தியாளர்களிடம் பேசியபோது காட்டமாகத் தெரிவித்துள்ளார். தவெகவில் 60 முதல் 70 எம்.எல்.ஏக்கள் அதிருப்தியில் இருப்பதாகக் கூறப்படும் நிலையில், அவர்களில் 60 பேர் இணைந்து அரசுக்கு எதிராக நம்பிக்கையில்லாத் தீர்மானம் கொண்டுவந்தால் அதை திமுக நிச்சயமாக ஆதரிக்கும் என்றும் அவர் குறிப்பிட்டார். மேலும், குட்டையைக் குழப்பி மீன் பிடிக்கப் பார்க்கும் தவெகவின் இத்தகைய அரசியல் உத்திகள் பலனளிக்காது எனச் சுட்டிக்காட்டிய அவர், தங்களின் அரசியல் நிலைப்பாட்டில் திமுக என்றும் உறுதியாக இருப்பதாகத் தெரிவித்தார்.
தற்போதைய தவெக ஆட்சியில் சிறைத்துறைப் பாதுகாப்பு கேள்விக்குறியாகியுள்ளதைச் சுட்டிக்காட்டிய ரகுபதி, திமுக ஆட்சிக் காலத்தில் சிறைத்துறை பாதுகாப்பு மிகவும் சிறப்பாக இருந்தது என்றார். தற்போதைய அரசு கமிட்டி அமைத்திருப்பதே பாதுகாப்பு குறைபாட்டை ஒப்புக்கொண்டதற்கான சான்றாகும் என்றும் விமர்சித்தார். மேலும், புதுக்கோட்டையில் புதிதாகத் திறந்து வைக்கப்பட்ட பேருந்து நிலையம் மற்றும் உள்விளையாட்டு அரங்கம் ஆகியவை திமுக ஆட்சிக் காலத்தில் கொண்டுவரப்பட்ட திட்டங்கள் என்றும், திமுகவின் சாதனைகளுக்குப் புதிய ஸ்டிக்கர் ஒட்டி தவெக அரசு விளம்பரம் தேடிக் கொள்கிறது என்றும் அவர் கடுமையாகக் குற்றம் சாட்டினார்.