தமிழகச் சட்டப்பேரவைத் தேர்தல் நெருங்கி வரும் வேளையில், ஆளும் திமுக மற்றும் அதன் கூட்டணிக் கட்சியான காங்கிரஸ் இடையே தொகுதிப் பங்கீட்டில் பெரும் இழுபறி நீடித்து வருகிறது. கடந்த முறையை விட கூடுதல் இடங்களைக் காங்கிரஸ் கோரி வரும் நிலையில், திமுகவோ தனது பிடியைத் தளர்த்தாமல் கறார் காட்டி வருகிறது. புதிய கட்சிகள் கூட்டணியில் இணைந்துள்ளதால், காங்கிரஸுக்கு அதிக இடங்களை ஒதுக்க முடியாது என்பதில் திமுக தலைமை உறுதியாக உள்ளது.
காங்கிரஸ் கட்சி 39 சட்டப்பேரவைத் தொகுதிகளையும், 2 மாநிலங்களவை இடங்களையும் (Rajya Sabha seats) கேட்டு அழுத்தம் கொடுத்து வருகிறது. ஆனால், திமுக தரப்பிலோ 25 சட்டப்பேரவைத் தொகுதிகள் மற்றும் ஒரு மாநிலங்களவை இடம் மட்டுமே தர முடியும் என்று திட்டவட்டமாகத் தெரிவிக்கப்பட்டுள்ளது. “இதுதான் எங்களது இறுதி முடிவு; காங்கிரஸ் தனது நிலையில் இருந்து இறங்கி வந்தால் மட்டுமே அடுத்தகட்ட பேச்சுவார்த்தை சாத்தியம்” என்று திமுகவின் மூத்த நிர்வாகிகள் தரப்பில் கூறப்படுகிறது.
தற்போது திமுக கூட்டணியில் மக்கள் நீதி மய்யம், தேமுதிக போன்ற புதிய கட்சிகள் இணைந்துள்ளன. மேலும், அதிமுகவில் இருந்து நீக்கப்பட்ட ஓ. பன்னீர்செல்வம் தனது ஆதரவாளர்களுடன் திமுகவில் இணைந்துள்ளது கூட்டணியை மேலும் வலுப்படுத்தியுள்ளது. இதனால், மற்ற சிறிய கட்சிகளுக்கும் இடங்களை ஒதுக்க வேண்டிய கட்டாயத்தில் திமுக இருப்பதால், காங்கிரஸுக்கு ஒதுக்கும் இடங்களைக் குறைக்க வேண்டிய சூழல் உருவாகியுள்ளதாகத் தெரிகிறது.
இந்த அதிரடி முடிவால் திமுக – காங்கிரஸ் கூட்டணி நீடிக்குமா அல்லது முறியுமா என்ற கேள்வி அரசியல் வட்டாரத்தில் எழுந்துள்ளது. திமுக இறங்கி வராத பட்சத்தில், காங்கிரஸ் மாற்று ஏற்பாடுகளைச் செய்ய வாய்ப்புள்ளதா என்ற விவாதங்களும் தொடங்கியுள்ளன. பந்து இப்போது காங்கிரஸ் கட்சியின் வசம் உள்ள நிலையில், அவர்கள் திமுகவின் நிபந்தனையை ஏற்பார்களா அல்லது கூட்டணியில் மாற்றம் நிகழுமா என்பதைப் பொறுத்திருந்துதான் பார்க்க வேண்டும்.