மதுரை கோச்சடை பகுதியில் அம்மா மக்கள் முன்னேற்றக் கழகத்தின் பொதுச்செயலாளர் டிடிவி தினகரன் செய்தியாளர்களைச் சந்தித்தார். அப்போது தற்போதைய தமிழக அரசியல் சூழல், தமிழக வெற்றிக் கழகத்தின் செயல்பாடுகள் மற்றும் முதல்வர் விஜய் குறித்துப் பல்வேறு அதிரடியான கருத்துகளையும், விமர்சனங்களையும் அவர் முன்வைத்தார். குறிப்பாக, தமிழக அரசியலில் எப்போதும் எதிர் எதிர் துருவங்களாக இருக்கும் திமுக மற்றும் அதிமுக ஆகிய கட்சிகள் கூட்டணி அமைப்பது குறித்தான அவரது கருத்து பெரும் பரபரப்பை ஏற்படுத்தியுள்ளது.
பாஜகவை எதிர்ப்பதற்காக திமுக மற்றும் தவெக ஆகிய கட்சிகள் ஒரே அணியில் இணைய வேண்டும் என்று விடுதலைச் சிறுத்தைகள் கட்சித் தலைவர் தொல். திருமாவளவன் கூறியிருந்த கருத்திற்கு டிடிவி தினகரன் பதிலடி கொடுத்துள்ளார். அரசியல் சூழ்நிலைகளின் அடிப்படையில் திமுக மற்றும் அதிமுக கூட கூட்டணி அமைக்கலாம் என்று குறிப்பிட்ட அவர், தங்களை எதிர்த்துப் போட்டியிட்டு வென்ற கட்சிகளின் ஆதரவோடு ஆட்சி அமைப்பது சரி என்றால், சுயநலத்திற்காக எந்தக் கட்சிகள் வேண்டுமானாலும் கூட்டணி அமைப்பதும் சரிதான் என்று அரசியல் சந்தர்ப்பவாதங்களைச் சாடினார்.
அதிமுகவில் தான் இணைவது குறித்த கேள்விக்குத் தெளிவுபடுத்திய தினகரன், அமமுக என்பது ஒரு தனித்துவமான கட்சி என்றும், தற்போது தாங்கள் அதிமுக கூட்டணியில் தொடர்ந்து நீடித்து, அவர்களுடன் இணைந்து பயணித்து வருவதாகவும் குறிப்பிட்டார். இதன் மூலம் அதிமுக கூட்டணியில் தங்களின் பலத்தை வலுப்படுத்துவதில் அமமுக உறுதியாக இருப்பதை அவர் வெளிப்படுத்தியுள்ளார்.
தொடர்ந்து பேசிய அவர், தமிழக முதல்வர் விஜய்யின் சமீபத்திய கரூர் பேச்சு குறித்தும், தவெகவின் அரசியல் செயல்பாடுகள் குறித்தும் கடுமையான விமர்சனங்களை முன்வைத்தார். கரூரில் பேசிய முதல்வர் விஜய்யின் உடல் மொழியிலும் பேச்சிலும் எந்தவித துக்கமும் தெரியவில்லை என்றும், அவர் இன்னும் ஒரு சினிமா நடிகராகவே கிளைமாக்ஸ் காட்சியில் பேசுவது போலப் பேசுகிறார் என்றும் சாடினார். மேலும், “வாழ்வு வந்துவிட்டது என்பதற்காக அர்த்த ராத்திரியில் குடை பிடிக்க வேண்டாம்” என்று குறிப்பிட்ட அவர், விஜய்யின் பேச்சில் அகங்காரமும் ஆணவமும் மட்டுமே தெரிவதாகக் குற்றம் சாட்டினார்.
திமுக மற்றும் அதிமுகவை ‘கூட்டு களவாணிகள்’ என முதல்வர் விஜய் விமர்சித்ததற்குப் பதிலடி கொடுத்த தினகரன், உண்மையில் விஜய்தான் ஒரு ‘எம்எல்ஏ களவாணி’ என்று மிகக் கடுமையான வார்த்தைகளால் விமர்சித்தார். தவெக என்பது தூய சக்தி அல்ல என்றும், தமிழ்நாட்டை அழிக்க வந்த நாசகார சக்தி என்றும் சாடிய அவர், பிற கட்சி உறுப்பினர்களைக் குதிரை பேரம் பேசி தங்கள் பக்கம் இழுப்பது மிகப்பெரிய ஊழல் என்று குறிப்பிட்டார். மேலும், மறைந்த நடிகர் விஜயகாந்துடன் விஜய்யை ஒப்பிடக் கூடாது என்றும், விஜயகாந்த் நிஜ வாழ்க்கையில் நடிக்கத் தெரியாத ஒரு மாமனிதர் என்றும் கூறி தனது செய்தியாளர் சந்திப்பை நிறைவு செய்தார்.