“திமுக இல்லை.. அதிமுக தான்”… கடைசி நேரத்தில் இபிஎஸ் கொடுத்த ஆஃபர்… ஓகே சொன்ன அண்ணியார்… கசிந்த ரகசியம்….!

தமிழக அரசியல் களத்தில் தேர்தல் களம் சூடுபிடித்துள்ள நிலையில், தேமுதிகவின் கூட்டணி நிலைப்பாடு குறித்த புதிய தகவல்கள் பெரும் பரபரப்பை ஏற்படுத்தியுள்ளன. தொடக்கத்தில் திமுகவுடன் பேச்சுவார்த்தை நடத்தி வருவதாக கூறப்பட்ட நிலையில், தற்போது திடீர் திருப்பமாக அதிமுக தலைமையிலான கூட்டணியில் தேமுதிக இணைய வாய்ப்புள்ளதாகத் தெரிகிறது. தேமுதிகவின் இந்தத் திடீர் மனமாற்றம் அரசியல் வட்டாரத்தில் உற்றுநோக்கப்படுகிறது.

கூட்டணிப் பேச்சுவார்த்தையில் தேமுதிக முன்வைத்த இரட்டை இலக்க தொகுதி கோரிக்கையை அதிமுக ஏற்றுக்கொண்டதாகத் தகவல்கள் கசிகின்றன. இதன்படி, அதிமுக கூட்டணியில் தேமுதிகவுக்கு 10 சட்டமன்றத் தொகுதிகள் மற்றும் ஒரு ராஜ்யசபா சீட் வழங்க உடன்பாடு எட்டப்பட்டுள்ளதாகக் கூறப்படுகிறது. இந்த கௌரவமான எண்ணிக்கையிலான இடங்கள் வழங்கப்படுவதால், தேமுதிக நிர்வாகிகள் மற்றும் தொண்டர்கள் மத்தியில் உற்சாகம் ஏற்பட்டுள்ளது.

திமுக கூட்டணியில் தேமுதிக இணையக்கூடும் என்று பரவலாகப் பேசப்பட்ட சூழலில், சீட் எண்ணிக்கையில் ஏற்பட்ட இழுபறி காரணமாக அந்தத் தரப்பில் முட்டுக்கட்டை விழுந்ததாகத் தெரிகிறது. கட்சியின் எதிர்காலத்தைக் கருத்தில்கொண்டு, மாவட்டச் செயலாளர்களின் கருத்துகளுக்கு மதிப்பளித்து, அதிக இடங்களை ஒதுக்க முன்வரும் அதிமுக பக்கம் பிரேமலதா விஜயகாந்த் சாய்ந்துள்ளதாக அரசியல் விமர்சகர்கள் கருதுகின்றனர்.

பிரதமர் மோடி தமிழகத்திற்கு வருகை தர உள்ள நிலையில், இன்னும் ஓரிரு நாட்களில் இந்தக் கூட்டணி அதிகாரப்பூர்வமாக அறிவிக்கப்பட வாய்ப்புள்ளது. அதிமுக, பாஜக, பாமக உள்ளிட்ட கட்சிகள் ஏற்கனவே ஒரு வலுவான அணியாகத் தென்படும் வேளையில், தேமுதிகவின் வருகை அந்தக் கூட்டணியின் பலத்தை மேலும் அதிகரிக்கும் என எதிர்பார்க்கப்படுகிறது. இது வரவிருக்கும் தேர்தலில் ஒரு மிகப்பெரிய அரசியல் மாற்றத்தை ஏற்படுத்துமா என்பதைப் பொறுத்திருந்துதான் பார்க்க வேண்டும்.