2026 தமிழகச் சட்டமன்றத் தேர்தலை முன்னிட்டு அரசியல் களம் சூடுபிடித்துள்ள நிலையில், திமுக மற்றும் அதிமுக கூட்டணிகளுக்குள் நிலவும் அதிகாரப் போட்டி குறித்த விவாதங்கள் எழுந்துள்ளன. ஆளுங்கட்சியான திமுக, தனது கூட்டணியில் முழு ஆதிக்கத்தைச் செலுத்தி வருவதோடு, தொகுதிப் பங்கீட்டு விவகாரத்தில் கூட்டணிக் கட்சிகளைக் கட்டுக்குள் வைத்துள்ளது.
இது குறிப்பாக, கூடுதல் இடங்களைக் கோரிய காங்கிரஸை குறைந்த அளவிலான தொகுதிகளுக்குச் சம்மதிக்க வைத்து, ஸ்டாலின் தனது பிடியை உறுதிப்படுத்தியுள்ளார். தேமுதிக போன்ற கட்சிகள் திமுக பக்கம் சாயத் தொடங்கியுள்ளது அக்கட்சிக்குக் கூடுதல் பலத்தைத் தந்துள்ளதாக அரசியல் நோக்கர்கள் கருதுகின்றனர்.
மேலும் மறுபுறம், அதிமுக கூட்டணியில் தொகுதிப் பங்கீடு மற்றும் தலைமைத்துவ முடிவுகளில் பாஜகவின் ஆதிக்கம் ஓங்கியிருப்பதாக விமர்சனங்கள் எழுந்துள்ளன. பாஜக சுமார் 60 தொகுதிகளைக் கோருவதாகவும், குறிப்பாகக் கோயில் நகரங்களை உள்ளடக்கிய தொகுதிகளில் ஆர்வம் காட்டுவதாகவும் தகவல்கள் தெரிவிக்கின்றன.
இது எடப்பாடி பழனிசாமி தலைமையிலான அதிமுகவிற்குப் பெரும் நெருக்கடியை ஏற்படுத்தியுள்ளது. பாமக மற்றும் இதர சிறிய கட்சிகள் பாஜகவின் முடிவுகளையே பெரிதும் சார்ந்திருப்பதால், அதிமுக கூட்டணியில் உண்மையான தலைமை யார் என்ற கேள்வி எழுந்துள்ளதுடன், எதிர்க்கட்சிக் கூட்டணியில் நிலவும் இந்த இழுபறி திமுகவிற்குச் சாதகமான சூழலை உருவாக்கியுள்ளது.