“அந்த 25 தொகுதிகள் யாருக்கு? – பிரேமலதா போட்ட ஸ்கெட்ச்”…. ஸ்டாலின் கொடுத்த ஓகே… தூக்கத்தைத் தொலைத்த சீனியர் புள்ளிகள்…!

தமிழக சட்டமன்றத் தேர்தல் களம் சூடுபிடித்துள்ள நிலையில், தேமுதிக மற்றும் திமுக இடையிலான கூட்டணி பேச்சுவார்த்தைகள் குறித்த தகவல்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. குறிப்பாக, விஜயகாந்தின் தேமுதிகவை தங்கள் பக்கம் இழுப்பதன் மூலம் வட தமிழகத்தில் வாக்கு வங்கியைப் பலப்படுத்த திமுக தலைமை முனைப்பு காட்டி வருகிறது. இந்த வியூகம் ஒருபுறம் வெற்றிக்கான வாய்ப்பாகப் பார்க்கப்பட்டாலும், மறுபுறம் திமுகவின் தற்போதைய எம்.எல்.ஏ-க்கள் மற்றும் மாவட்டச் செயலாளர்கள் மத்தியில் ஒருவித கலக்கத்தை உண்டாக்கியுள்ளது.

திமுக தலைமையிலான கூட்டணியில் ஏற்கனவே விசிக, கம்யூனிஸ்ட் கட்சிகள் மற்றும் காங்கிரஸ் போன்ற வலிமையான கட்சிகள் உள்ளன. இவர்களுக்குத் தொகுதிகளைப் பங்கீடு செய்வதிலேயே பெரும் சவால்கள் இருக்கும் சூழலில், தற்போது தேமுதிகவும் உள்ளே வந்தால் தங்களுக்கு ஒதுக்கப்படும் இடங்கள் குறைந்துவிடுமோ என்ற அச்சம் திமுகவின் சிட்டிங் எம்.எல்.ஏ-க்களுக்கு எழுந்துள்ளது. குறிப்பாக, வட மாவட்டங்களில் செல்வாக்கு பெற்ற திமுக புள்ளிகள், தேமுதிகவின் வருகையால் தங்கள் கைவசம் உள்ள தொகுதிகளை இழக்க நேரிடும் எனப் பீதியில் உள்ளனர்.

இந்த விவகாரத்தில் திமுகவின் முக்கிய மூத்த தலைவர் ஒருவர் கடும் அதிருப்தியில் இருப்பதாகக் கூறப்படுகிறது. கட்சியின் மூத்த நிர்வாகியாகவும், செல்வாக்கு மிக்க அமைச்சராகவும் இருக்கும் அவர், தேமுதிகவுக்கு அதிக இடங்களை விட்டுக்கொடுப்பது நீண்டகால அடிப்படையில் கட்சிக்குச் சரிவை ஏற்படுத்தும் எனக் கருதுகிறார். இதனால், தொகுதிப் பங்கீடு தொடர்பாக அறிவாலயத்தில் நடக்கும் ஆலோசனைகளில் ஒருவித இறுக்கமான சூழல் நிலவுவதாகத் தெரிகிறது.

இருப்பினும், முதல்வர் ஸ்டாலினைப் பொறுத்தவரை வரவிருக்கும் தேர்தலில் ஒரு தொகுதியைக்கூட இழக்கக் கூடாது என்பதில் உறுதியாக இருக்கிறார். எடப்பாடி பழனிசாமியின் அதிமுக கூட்டணிக்குச் சவாலாக அமைய, தேமுதிக போன்ற கட்சிகளின் ஆதரவு அவசியம் என அவர் நினைக்கிறார். “வெற்றி மட்டுமே இலக்கு” என்ற நோக்கில் திமுக தலைமை எடுக்கும் இந்த அதிரடி முடிவுகள், கட்சிக்குள் இருக்கும் ‘சிட்டிங்’ விஐபிக்களின் தூக்கத்தைத் தொலைக்கச் செய்துள்ளதே தற்போதைய அரசியல் நிலவரம்.