2026 தமிழக சட்டமன்றத் தேர்தல் முடிவுகள் திமுகவுக்கு எதிர்பாராத பின்னடைவை ஏற்படுத்தியுள்ள நிலையில், கட்சி வரலாற்றிலேயே இல்லாத வகையில் அடிமட்ட அமைப்பு முழுவதும் பெரும் மறுசீரமைப்புக்கு உள்ளாகத் தொடங்கியுள்ளது. தேர்தல் தோல்விக்கான காரணங்களை ஆராய்ந்த கட்சித் தலைவர் ஸ்டாலின், உட்கட்டமைப்பில் மிகப்பெரிய அறுவை சிகிச்சையை மேற்கொள்ளத் தயாராகி வருகிறார். உள் புலனாய்வு அறிக்கைகளின்படி, பல மாவட்டங்களில் நிலவிய உட்கட்சி பூசல்கள், உள்ளூர் தலைமைகளின் அலட்சியம் மற்றும் புதிய அரசியல் சக்திகளின் அசுர வளர்ச்சியை சரியாகக் கணிக்கத் தவறியதே இந்தத் தோல்விக்கு முக்கிய காரணங்களாகச் சுட்டிக்காட்டப்பட்டுள்ளன.
இதன் முதல்கட்டமாக, தேர்தல் பணிகளில் சுணக்கம் காட்டிய சுமார் 30 முதல் 35 மாவட்ட செயலாளர்களை அதிரடியாக மாற்ற திமுக தலைமை திட்டமிட்டுள்ளது. மூத்த தலைவர்கள், செல்வாக்கு மிக்கவர்கள் என்ற பாகுபாடின்றி, தோல்விக்குக் காரணமானவர்கள் மீதும், தொண்டர்களை ஒருங்கிணைக்கத் தவறியவர்கள் மீதும் இந்த நடவடிக்கை பாயவுள்ளது. குறிப்பாக, திமுக பலவீனமடைந்துள்ள தென் மாவட்டங்கள் மற்றும் கொங்கு மண்டலத்தை மீட்டெடுக்கத் தனி குழுக்கள் அமைக்கப்பட உள்ளன. இந்த அதிரடி மாற்றங்கள் மூலம், இளம் மற்றும் துடிப்பான புதிய முகங்களுக்கு மாவட்டப் பொறுப்புகளை வழங்கி கட்சியைப் புதுப்பிக்க ஸ்டாலின் முடிவு செய்துள்ளார்.
கட்சியின் அடிமட்ட அளவில் மட்டுமின்றி, உச்சத் தலைமையிலும் ஒரு முக்கிய அதிகாரப் பகிர்வு நிகழவிருப்பதாக அறிவாலய வட்டாரங்கள் தெரிவிக்கின்றன. நாடாளுமன்றக் குழுத் தலைவரான கனிமொழி கருணாநிதிக்கு “செயல் தலைவர்”அந்தஸ்து வழங்கப்படலாம் என்ற பலமான தகவல் வெளியாகியுள்ளது. உதயநிதி ஸ்டாலின் ஏற்கனவே இளைஞரணியின் முகமாக முன்னிறுத்தப்பட்டுள்ள நிலையில், கனிமொழியின் அரசியல் முதிர்ச்சி, டெல்லி நாடாளுமன்ற அனுபவம் மற்றும் பெண்கள் மத்தியிலான செல்வாக்கு ஆகியவற்றை முழுமையாகப் பயன்படுத்திக் கொள்ள கட்சித் தலைமை விரும்புகிறது.
இனிவரும் காலங்களில் மு.க.ஸ்டாலின் தற்காலிகமாகப் பின்னணியில் இருந்து வழிகாட்ட, உதயநிதி மற்றும் கனிமொழி ஆகிய இருவர் இணைந்து கட்சியை “இரட்டைக்குழல் துப்பாக்கி” போல வழிநடத்தும் புதிய வியூகம் வகுக்கப்பட்டு வருகிறது. கலைஞர் காலத்து பாரம்பரிய அரசியல் முறையிலிருந்து மாறி, புதிய தலைமுறை வாக்காளர்களை ஈர்க்கும் நோக்கில் இந்த ‘மெகா ரீவாம்ப் திட்டம் உருவாக்கப்பட்டுள்ளது. வரவிருக்கும் திமுக செயற்குழு அல்லது பொதுக்குழு கூட்டத்தில் அதிகாரப்பூர்வமாக அறிவிக்கப்படவுள்ள இந்த அதிரடி முடிவுகள், தமிழக அரசியலில் ஒரு புதிய திருப்பத்தை ஏற்படுத்தும் என எதிர்பார்க்கப்படுகிறது.