அந்தப் படம் மட்டும் இப்போ ரிலீஸ் ஆனா தியேட்டர்கள் எரிக்கப்படும்.. அஜித் பட இயக்குனர் ராஜுவ் மேனன் ஓபன் டாக்..!

சினிமாவை பொறுத்தவரையில் ஒரு சில திரைப்படங்கள் என்டர்டைன்மென்ட் என்பதையும் கடந்து மனதில் ஆழமாக பதிந்து விடும். எத்தனை காலங்களைக் கடந்தாலும் அவை ஒரு அழுத்தமான உணர்வை ஒவ்வொரு முறையும் கடத்தி செல்லும். அப்படிப்பட்ட படங்களில் ஒன்றுதான் மணிரத்தினம், ஏ ஆர் ரகுமான், ராஜுவ் மேனன் என மூன்று மாபெரும் கலைஞர்களின் கூட்டணியில் கடந்த 1995 ஆம் ஆண்டு வெளியான பம்பாய் திரைப்படம். மணிரத்தினத்தின் அக்மார்க் படைப்பான இந்த திரைப்படம் வெளியாகி கிட்டத்தட்ட 30 ஆண்டுகள் ஆகிவிட்டது.

அயோத்தியில் பாபர் மசூதி இடிக்கப்பட்ட உண்மை சம்பவத்தை அடிப்படையாகக் கொண்டு மதவாத பிரச்சனைகள், மதம் கடந்த காதலை தைரியமாக கையில் எடுத்து மணிரத்தினம் இயக்கிய இந்த திரைப்படம் இன்று வரை பார்வையாளர்களை அதிகமாக பாதித்தது. அரவிந்த்சாமி, மனிஷா கொய்ராலா இருவரும் அவர்களின் காதலால் கண்களின் மூலம் உயிருக்குள் புகுந்து ஆர்ப்பரித்தனர். இந்தத் திரைப்படம் பல வருடங்கள் கடந்தும் இன்றும் ரசிகர்கள் மத்தியில் கொண்டாடப்படுகிறது.

இந்நிலையில் பம்பாய் திரைப்படத்திற்கு ஒளிப்பதிவு செய்த ராஜுவ்  மேனன் இன்று அந்த திரைப்படம் திரையரங்குகளில் வெளியாவது சிரமமாக இருக்கும் என்று சமீபத்திய யூடியூப் பேட்டியில் தெரிவித்துள்ளார். இது தொடர்பாக பேசிய அவர், பம்பாய் திரைப்படம் வெளியாகி 3 தசாப்தங்களில் இந்தியா சகிப்புத்தன்மை குறைந்த நாடாக மாறிவிட்டது. பம்பாய் போன்ற ஒரு படத்தை இன்று எடுக்க முடியாது. இந்தியாவின் நிலமை மிகவும் கொந்தளிப்பாக உள்ளது. மக்கள் மிகவும் கடினமான நிலைப்பாடுகளை எடுக்கின்றன. மதம் என்பது ஒரு பெரிய பிரச்சனையாகி விட்டது. பம்பாய் போன்ற ஒரு படத்தை எடுத்து திரையரங்கில் வெளியிட்டு திரையரங்கு எரிக்கப்படாது என்று எதிர்பார்க்க முடியாது என நான் நினைக்கிறேன். இந்த 25 முதல் 30 ஆண்டுகளில் இந்தியா குறைவான சகிப்புத்தன்மை கொண்ட நாடாக மாறிவிட்டது என்று தெரிவித்துள்ளார்.