“ஐயோ… ரகசியத்தை வச்சுக்கிட்டு என்னதான் பண்றீங்க?… திமுக & தவெக-வை ஒரே மேடையில் வெளுத்து வாங்கிய இயக்குநர்… இணையத்தில் தீயாய் பரவும் வீடியோ…!”

இயக்குநர் பா.ரஞ்சித் தலைமையிலான நீலம் மாணவர் இயக்கம் சார்பில், நீட் வினாத்தாள் கசிவு மற்றும் நீட் தேர்வுக்கு எதிராகச் சென்னையில் நடைபெற்ற போராட்டத்தில் இயக்குநர்கள் அமீர், வெற்றிமாறன் உள்ளிட்ட பலர் கலந்துகொண்டனர். அங்கு பேசிய இயக்குநர் அமீர், ஜனநாயகத்திற்காகச் சிலரே போராடும் வேளையில், திரைப்படங்களைக் கொண்டாடவே பெருங்கூட்டம் திரள்வதாகக் வேதனை தெரிவித்தார். மேலும், “நீட் தேர்வை ரத்து செய்ய எங்களிடம் ரகசியம் இருக்கிறது” என்று கூறி ஆட்சிக்கு வந்த திமுக, ஐந்து ஆண்டுகள் முடிந்தும் அதை நிறைவேற்றவில்லை என்றும், ஆட்சி மாற்றத்திற்குப் பின் வந்த தவெக அரசும் நீட் தேர்வுக்கு எதிராக உறுதியான நடவடிக்கைகளை எடுக்கவில்லை என்றும் இரு கட்சிகளையும் கடுமையாகச் சாடினார்.

நீட் தேர்வுக்கு எதிராகப் பல ஆண்டுகளாகத் தொடர்ந்து குரல் கொடுத்து வருவதாகக் குறிப்பிட்ட அவர், அனிதாவின் மரணத்தில் தொடங்கிய துயரம் இன்னமும் தொடர்வதாகக் கூறினார். கோடி கணக்கில் தொண்டர்கள் இருப்பதாகப் பெருமை பேசும் அரசியல் கட்சிகள், மாணவர்களின் இந்த நியாயமான போராட்டத்திற்குத் தங்கள் தொண்டர்களைத் திரட்டி ஆதரவு அளிப்பதில்லை என்றும் விமர்சித்தார். அரசியல் என்பது பலருக்கு வெறும் பிழைப்புவாதமாக மாறிவிட்டதால், ஆட்சியாளர்களோ அல்லது அதிகாரத்தைக் கைப்பற்றத் துடிக்கும் கட்சிகளோ நீட் தேர்வை ரத்து செய்வார்கள் என்று நம்புவது மக்களை ஏமாற்றும் செயல் என்று அவர் கொந்தளிப்புடன் தெரிவித்தார்.

நீட் தேர்வை எதிர்த்துத் தமிழகத்திலும் டெல்லியிலும் மாணவர்கள் வீதியில் இறங்கிப் போராடி வரும் சூழலில், தமிழக அரசு அவர்கள் மீது கைது நடவடிக்கை எடுப்பதையும் அமீர் சுட்டிக்காட்டினார். திமுக ஆட்சியில் நீட் விலக்குக்கான ரகசியம் என்று வாக்குறுதி அளித்து ஏமாற்றியதும், தற்போது ஆட்சியில் இருக்கும் விஜய்யின் தவெக அரசும் நீட் விவகாரத்தில் சொன்னதைச் செய்யாமல் போராட்டக்காரர்களைக் கைது செய்வதும் தான் அமீரின் இந்த காரசாரமான விமர்சனத்திற்குப் பின்னணியாக அமைந்துள்ளது.