தமிழக அரசியலில் தேர்தல் களங்கள் மாறினாலும், மேடைப் பேச்சுகளில் சில தலைவர்கள் நிகழ்த்தும் சுவாரசியங்களுக்கு என்றுமே பஞ்சமிருப்பதில்லை. அந்த வகையில், அதிமுக மூத்த நிர்வாகியும் முன்னாள் அமைச்சருமான திண்டுக்கல் சீனிவாசன், திண்டுக்கலில் நடைபெற்ற கட்சி ஆலோசனைக் கூட்டத்தில் தனது வழக்கமான ‘டங் ஸ்லிப்’ (நாத்தவறு) பாணியிலும், அதிரடி நக்கல்களாலும் ஒட்டுமொத்த கூட்டத்தையும் அதிரவைத்துள்ளார். அவர் பேசிய ஒவ்வொரு கருத்தும், மேடையில் நடந்த சம்பவங்களும் தற்போது சமூக வலைதளங்களில் பேசுபொருளாக மாறியுள்ளன.
இந்த ஆலோசனைக் கூட்டத்தில் பேசிய திண்டுக்கல் சீனிவாசன், வரலாற்றுச் சம்பவங்களைக் குறிப்பிடும்போது வழக்கம்போலவே அடுத்தடுத்து உளறிக்கொட்டினார். “சக்ரவர்த்தி திருமகள் படம் வந்து 60 ஆண்டுகள் ஆகிவிட்டன; அதில் ‘நயவஞ்சகரின் நாக்கு’ என்று கருணாநிதியை நம் தலைவர் விமர்சித்தார்… இல்லை, அன்றைக்கு கருணாநிதி இல்லை, காங்கிரஸை விமர்சித்தார்” என்று உடனுக்குடன் அவரே திருத்திக்கொண்டார். அதுமட்டுமன்றி, அதிமுக எம்.எல்.ஏ மரகதம் குமரவேல் என்று குறிப்பிடுவதற்குப் பதிலாக, ‘மரகதம் சந்திரசேகர்’ என்று மாற்றிப் பேசி தொண்டர்களிடையே சிரிப்பலையை ஏற்படுத்தினார்.
கட்சியை விட்டு விலகி தவெக உள்ளிட்ட பிற கட்சிகளுக்குச் சென்றவர்களைக் கடுமையாகச் சாடிய அவர், “தோழர்களே! உங்களுக்கு எது கிடைக்கிறதோ அதை வைத்து அடியுங்கள், அவர்கள் நன்றி கெட்டவர்கள்” என்று ஆவேசப்பட்டார். அப்போது கூட்டத்தில் தொடர்ந்து செல்போனில் பேசிக்கொண்டிருந்த ஒரு தொண்டரைக் கவனித்த சீனிவாசன், கடுமையான கோபத்துடன், “உனக்கு காதலி ஏதாவது இருக்கா? செல்லை பிடிச்சு உடைச்சுருவேன்! நீ கொத்தனாரா, சித்தாள்களை எல்லாம் கூப்பிட்டு வந்திருக்கியா?” என்று ஒருமையில் விளாசி, அவரை வெளியேற்ற உத்தரவிட்டார்.
அத்தோடு நிறுத்தாமல், தனக்கு அறிவுரை கூற முயன்ற மற்றொரு தொண்டரையும் நக்கலாக வாரிப் போட்டார். “புத்திமதி எல்லாம் சொல்லாதீங்க, உட்காருப்பா! உன் கூட உன் மனைவி எப்படி வாழ்கிறாளோ தெரியவில்லை” என்று அவர் கிண்டலடித்தபோது கூட்டத்தில் சிரிப்பு சத்தம் அடங்க நேரமானது. இறுதியாக, “என் மகன் மாற்றுக்கட்சிக்கு போவதை என்னால் தடுக்க முடியவில்லை என்றால் நான் எதற்கு வேட்டி, சட்டை கட்ட வேண்டும்?” என்று ஆவேசமாக கேள்வி எழுப்பிய அவர், அரசுப் பள்ளி மாணவர்களுக்கான 7.5% நீட் உள்ஒதுக்கீட்டை எடப்பாடி பழனிசாமி கொண்டு வந்ததை நினைவுகூர்ந்து தனது உரையை முடித்தார்.